«Китобхонлик ҳафталиги»нинг тантанали очилиш маросими бўлиб ўтди

Жорий йилнинг 4 апрель куни Самарқанд ветеринария медицинаси институти Нукус филиалида  «Китобхонлик ҳафталиги»нинг тантанали очилиш маросими ҳамда  Ўзбекистон ва Қорақалпоғистон ёзувчилар уюшмаси аъзоси, ёзувчи ва тележурналист Сағындық Ембергеновнинг 70 йиллик юбилейига бағишланган тадбир бўлиб ўтди. 

Ушбу тадбирда Ўзбекистон ва Қорақалпоғистон ёзувчилар уюшмаси масъул котиби, “Шуҳрат”медали соҳиби Б.Ерназаров, Қорақалпоғистон халқ ёзувчиси, филология фанлари номзоди А.Абдиев, Ўзбекистон ва Қорақалпоғистон Ёзувчилар уюшмаси аъзоси, шоир ва ёзувчи Я.Ажимов, ҳамда Ўзбекистон ва Қорақалпоғистон ёзувчилар уюшмаси аъзоси, ёзувчи ва тележурналист С.Ембергенов, Қорақалпоғистон Республикаси болалар кутубхонаси директори З.Сейтниязова, филиал Ахборот–ресурс маркази бўлими бошлиғи Ж.Халмуратова, профессор-ўқитувчилар ҳамда талаба-ёшлар қатнашди. Тантанали очилиш маросимини Ёшлар масалалари ва маънавий-маърифий ишлар бўйича директор ўринбосари С.Ганиев кириш сўзи билан очиб берди. Тадбирда ташриф буюрган меҳмонлар навбат билан сўз олиб, талаба-ёшлар орасида китобхонликни кенг тарғиб қилиш мақсадида ташкил этилаётган «Китобхонлик ҳафталиги»нинг аҳамияти борасида тўхталиб ўтди. 

Шунингдек, С.Ембергеновнинг ҳаёти ва ижоди, тележурналистика соҳасига қўшган ҳиссаси ҳақида алоҳида гапириб ўтилди. 70 ёшни қаршилаётган нуроний меҳмонимизга ҳурмат белгиси сифатида совға топширилди. Тадбир филиал матбуот котиби З.Хожамуратова бошчилигида талаба-ёшлар томонидан тайёрланган қизиқарли концерт дастури билан давом этди. Мавзуга оид таъсирли саҳнали кўринишлар, рақс ва мусиқалар ҳаммага бирдек кўтаринки кайфият бағишлади. Ушбу ҳафталик доирасида талаба-ёшлар орасида китобхонликни кенг тарғиб қилишга қаратилган қизиқарли танловлар, викториналар, «Заковат» интеллектуал ўйинлари, «Энг яхши китобхон талаба» номинацияси бўйича танловларни ўтказиш режалаштирилмоқда. Ҳафта якунида эса фаол иштирокчиларни тақдирлаш маросими бўлиб ўтиши кутилмоқда. Бугунги «Китобхонлик ҳафталиги»нинг очилиш маросими юқори савияда ташкил этилди.