SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial jamoasi o‘quv muassasasining 6 yilligini nishonladi

Bugun, 13 –noyabr Samarqand veterinariya meditsinasi instituti Nukus filiali (hozirda Samarqand davlat veterinariya meditsinasi, chorvachilik va biotexnologiyalar universiteti Nukus filiali) tashkil topgan kun . Ushbu sana munosabati bilan oliygohda o‘quv muassasasining 6 yilligi nishonlandi. Tadbir boshida filial direktori, professor A.Esimbetov so‘z olib, filial tarixi, tashkil etilganidan to bugungi kunga qadar erishgan va erishib kelayotgan yutuqlari, mashaqat va qilingan mehnatlar haqida to‘xtaldi. Yig‘ilganlarni filial tashkil etilganligiga 6 yil to‘lishi munosabati bilan samimiy tadbikladi. Shundan so‘ng O‘zbekiston Respublikasi Veterinariya va chorvachilikni rivojlantirish qo‘mitasi Fan va ta'lim sohasini rivojlantirish boshqarmasi boshlig‘i o‘rinbosari, veterinariya fanlari doktori, professor S.Mavlonov, Qoraqalpog‘iston Respublikasi veterinariya va chorvachilikni rivojlantirish qo‘mitasining Nukus shahar bo‘limi boshlig‘i Q.Pirnazarov, direktor o‘rinbosarlari so‘zga chiqib, ushbu sana bilan barchani chin dildan qutlab, o‘zlarining ezgu tilaklarini bildirishdi. Bugungi kunda davlatimiz tomonidan veterinariya va chorvachilik sohasiga qaratilayotgan alohida e'tibor va amalga oshirilayotgan yirik loyihalarga alohida urg‘u berib o‘tildi.

Tadbir davomida filial tashkil etilgan davrlaridan boshlab samarali faoliyat yuritib kelayotgan hamda filialning rivoji uchun hissa qo‘shib kelayotgan bir guruh xodimlar tashakkurnoma va esdalik sovg‘alari bilan taqdirlandi. —Dastlabki yillari sanoqli xodimlar bilan ish boshlaganmiz, ko‘p qiyinchilik va sinovlarni birga yengib, og‘izbirchilik bilan filialning bugungi imidjini yaratdik—deydi filial direktori A.Esimbetov —albatta, buning ortida qancha samarali mehnat yotganligi faqatgina o‘zimizga ma'lum. Qisqa yillar ichida ko‘pgina muvaffaqiyatlarni qo‘lga kirgizdik, Qoraqalpog‘istondagi oliy o‘quv yurtlari ichida o‘z o‘rnimizga ega bo‘ldik.
Tabrik so‘zlari va taqdirlash marosimidan so‘ng filialning iqtidorli talaba-yoshlari tomonidan bayramona konsert dasturi qo‘yib berildi. Tadbir yakunida filialning bugungi kunga qadar faoliyati hakida videorolik namoyish etildi.

Ma'lumot o‘rnida, Muhtaram Prezidentimizning 2018 yil 15-16-noyabr kunlari Qoraqalpog‘iston Respublikasiga tashrifida Qoraqalpog‘istonda chorvachilik, baliqchilik, parrandachilik va veterinariya xizmatlarini rivojlantirish va ushbu sohaga oliy ma'lumotli etuk, raxobatbordosh, kadrlarni tayyorlashga katta e'tibor qaratilishini ta'kidlab o‘tgan edi. Va shu asosda O‘zbekiston Respublikasi Vazirlar Mahkamasining 2018-yil 13- noyabrdagi №926-sonli qarori asosida Samarqand veterinariya medisinasi instituti Nukus filiali tashkil etildi. O‘zbekiston Respublikasi Prezidentining 2022-yil 31 martdagi «Veterinariya va chorvachilik sohasida kadrlar tayyorlash tizimini tubdan takomillashtirish to‘g‘risida»gi qarori asosida Samarqand veterinariya medisinasi instituti Samarqand davlat veterinariya medisinasi, chorvachilik va biotexnologiyalar universiteti sifatida tashkil etildi va institutning Toshkent va Nukus filiallari tegishli ravishda Universitetning Toshkent va Nukus filiallari deb qayta nomlandi.
Hozirgi kunda filialda 1000 dan ziyod talaba-yoshlarga 80 dan ziyod professor-o‘qituvchi zamonaviy bilimlarni berib kelmoqda.