SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Yashil makon» umummilliy loyihasi doirasida filial hududi yanada obod bo‘lmoqda

Muhtaram Prezidentimizning ezgu tashabbusi bilan boshlangan «Yashil makon» umummilliy harakatiga joriy yilda 3 yil bo‘ldi. Shu davr ichida yurtimizdagi bo‘sh maydonlar, yashil bog‘, mahalla va ko‘chalar bo‘ylab gul va har xil daraxt ko‘chatlari ekilib ko‘rkam yashil maydon barpo etildi. O‘zimiz yashayotgan mahalla, ishlayotgan va o‘qib tahsil olayotgan joylarimiz obod va maftunkor bo‘lsa ko‘nglimiz xotirjam, kayfiyatimiz esa chog‘ bo‘ladi.
Samarqand davlat veterinariya meditsinasi, chorvachilik va biotexnologiyalar universiteti Nukus filialida ham «Yashil makon» umummilliy loyihasi doirasida ko‘chat ekish aksiyalari tashkil etilib, o‘quv binosi hududi yashil maydonga aylantirilmoqda. Jumladan, qayrag‘och, yapon saforasi, katal'pa, tut, jiyda, archa singari ko‘chatlar, mevali va manzarali daraxt ko‘chatlari ekilib kelinmoqda.

Bugun ham «Yashil makon» umummilliy loyihasi doirasida hashar o‘tkazilib, barcha ko‘ngilli talaba-yoshlar tomonidan uyushqoqlik bilan 200 tupga yaqin mevali va manzarali daraxt ko‘chatlari o‘tqazildi. Shuningdek, xushkayfiyat bilan hamjihatlikda ariqlar va yo‘laklar chiqindilardan tozalandi, talaba-qizlar atrofni supirib sidirishdi, to‘kilgan barglarni tozalashdi, ko‘chatlarni suv bilan sug‘orishdi. Shu tarzda yoshlar faollik ko‘rsatib, filial hududida yashil maydon barpo etilishiga o‘zlarining ezgu hissalarini qo‘shdilar.

Shu kunga qadar filial jamoasi va talaba-yoshlar «Yashil makon» umummilliy harakati doirasida amalga oshirilayotgan aksiyalarda faol qatnashib kelishmoqda. Jumladan, o‘tgan yil bahor mavsumida filial va unga biriktirilgan hududlarda 2850 tup mevali va manzarali daraxt ko‘chatlarini o‘tqazib kelishmoqda. Albatta, bunday ezgu ishlar davom ettiriladi. Ma'lumot o‘rnida, joriy yil kuz mavsumida jami 7 ming tup daraxt va buta ko‘chatlari ekilishi rejalashtirilgan.