SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Bitiruvchi yoshlar «Veterinar qasamyodi»ni qabul qilishdi

Joriy yilning 20-iyul kuni Samarqand davlat veterinariya meditsinasi, chorvachilik va biotexnologiyalar universiteti Nukus filialida “Oq yo‘l sizga, bitiruvchi!” shiori ostida 2023-2024 o‘quv yili bitiruvchilariga diplom topshirish marosimi bo‘lib o‘tdi. Tadbirda filial rahbariyati, Qoraqalpog‘iston Respublikasi Veterinariya va chorvachilikni rivojlantirish qo‘mitasi rahbariyati, ota-onalar, professor-o‘qituvchilar va bitiruvchi talaba-yoshlar ishtirok etishdi.

Filial direktori, professor Adilbay Esimbetov so‘zga chiqib, yangi marralar sari qadam tashlayotgan bitiruvchi yoshlarni samimiy qutlab, ularning 4 yil mobaynida qo‘lga kiritgan yutuqlarini g‘urur bilan tilga olib, alohida ta'kidlab o‘tdi. —Mana bugun barchangiz katta hayot, yangi imkoniyatlar sari qadam qo‘ymoqdasiz—deydi direktor A.Esimbetov—sizlarga aytar o‘gitim, hamiysha o‘z bilimingizga tayaning, yuksak intellekt, zamonaviy fikrlash va yetuk bilim sizning kelajakdagi imidjingizni yaratib beradi.
Shundan so‘ng tadbirning kulminatsiya nuqtasi yetib keldi va “Veterinar qasamyodi” marosimi o‘tkazildi. Veterinariya meditsinasi yo‘nalishining bitiruvchi yoshlari tantanali ravishda «Veterinar qasamyodi»ni qabul qilib, o‘z kasbiga sodiq xizmat qilishga va'da berishdi. Mana shunday hayojonli fursatlarda bayram tadbiriga tashrif buyurgan ota-onalar so‘zga chiqib, farzandlariga bilim va tarbiya bergan filial professor-o‘qituvchilariga minnatdorchilik bildirib, barcha bitiruvchilarga oq yo‘l tilashdi.

Shundan so‘ng filialning taniqli «Qarekenshe online» jamoasining a'zolari bo‘lgan bitiruvchi yoshlar alohida etirof etilib, ularga filial uchun qilgan xolis xizmatlari uchun chuqur minnatdorchilik bildirildi. Aynan ushbu jamoa ishtirokida ajoyib konsert dasturi namoyish etildi. Tadbir yakunida esa bitiruvchilarga diplomlar tantanali ravishda topshirildi. Ma'lumot o‘rnida, joriy o‘quv yilida 5 ta yo‘nalish bo‘yicha jami 356 nafar talaba mutaxassisligi bo‘yicha diplomga ega bo‘ldi. Ushbu raqamlar filial tarixidagi birinchi eng ko‘p bitiruvchilar bo‘lib tariximizga muhirlanib qoladi.