SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Yoshlarga qaynoq taassurotlarni va yangi orzularni tuhfa qilgan forum

Samarqand davlat veterinariya meditsinasi, chorvachilik va biotexnologiyalar universitetida har yili o‘tkazilishi an'anaga aylanib ulgurgan Respublika yoshlar forumiga start berildi. Filial direktori A.Esimbetov boshchiligidagi delegatsiya ushbu forumda ishtirok etish uchun kuni kecha Samarqandga yetib kelganligi va mehmonlar tantanali tarzda kutib olingani haqida xabar bergan edik. Bugun esa forumning tantanali ochilish marosimi bo‘lib o‘tdi. Unda universitet rektori, professor X.Yunusov so‘zga chiqib, bugun yoshlar uchun yaratib berilayotgan talaygina imkoniyatlar, Oliy ta'lim sohasida olib borilayotgan o‘zgarishlar va beg‘ubor orzular yetagidan mahkam tutgan yoshlarning erishayotgan yutuqlari haqida to‘xtaldi. Forumga rasmiy tarzad start berilgach, 5 ta muhim tashabbus doirasida qiziqarli tanlovlar, har xil sport musobaqalari, “Munozara-debat” va “Zakovat” intellektual o‘yinlari, «Talabalar teatr studiyasi» ko‘rik-tanlovi kabi tadbirlar o‘tkazildi. Tashkil etilgan mazkur tanlovlarda universitet va uning
Toshkent filiali talabalari, texnikum va litsey o‘quvchilari faol ishtirok etishdi. Filial talabalari ham hamjihatlik bilan tadbirlarda qatnashib, faollik ko‘rastishdi. O‘z intilishi va tirishqoqligi bilan sovrinli o‘rinlarni qo‘lga kiritishdi. Jumladan, «Debat» intellektual o‘yinida o‘zlarining topqirligi va oratorlik mahoratini koʻrsatib, 2-oʻrinni egallashga muvaffaq boʻlishdi. Shuningdek, «Talabalar teatr studiyasi» ko‘rik-tanlovida iqtidorli talaba-yoshlarimiz yozuvchi Said Ahmadning "Ufq" trilogiyasi asosida sahnalashtirilgan spektakli bilan faol qatnashib, 2-o‘rinni egallashdi. Talabalar o‘z iste'dodlarini namoyon qilishdi. “Quvnoqlar va zukkolar” ko‘rik-tanlovida esa filialning "Tulpor" jamoasi ikkinchi o‘rinni egalladi. Quvnoq talaba-yoshlar o‘zlarining ajoyib chiqishlari bilan barchaga ko‘tarinki kayfiyat ulashdi. Haqiqiy yoshlar atmosferasi yaratib berilgan III Respublika Yoshlar forumida sportning voleybol turi bo‘yicha o‘tkazilgan musobaqada
filialimiz jamoasi voleybolchilari fahrli birinchi o‘rinni qo‘lga kiritishdi. Shu tarzda talabalar musobaqa va tanlovlarda faollik ko‘rsatib, munosib o‘rinlarni egallashdi. Tanlov va musobaqalar o‘z yakuniga yetgach, tantanali taqdirlash marosimi va bitiruvchi talabalarning tantanali bitiruv kechasi o‘tkazildi.
Tadbir boshida universitet rektori, professor X.Yunusov so‘zga chiqib, tadbir qatnachilariga minnatdorchilik bildirib, yaqinlashib kelayotgan yoshlar bayrami bilan samimiy tabriklab, bitiruvchilarga oq yo‘l tiladi. Tadbir boshida universitet va filial bitiruvchi kurs talaba-yoshlari “Veterinar qasamyodi”ni qabul qilishdi. Taqdirlash marosimida esa barcha g‘oliblar diplom va qimmatbaho sovg‘a bilan taqdirlandi. Jumladan, qator tadbirlarlarda o‘rin egallashga muvaffaq bo‘lgan filial talaba-yoshlariga ham sovg‘alar topshirildi. Tadbir qiziqarli konsert dasturi bilan advom etdi.

— Har yili o‘tkazib kelinayotgan yoshlar forumi bu yil ham yuqori saviyada tashkil etildi. Shaxsan o‘zim ushbu tadbirga ilk marta ishtirok etishim —deydi filial direktori A.Esimbetov —bizga ko‘rsatilgan ehtirom va tashkiliy ishlarga tasannolar aytmasdan iloj yo‘qdir. Yoshlar uchun haqiqiy bayram atmosferasi yaratib berildi. Ular bilan birga men ham o‘zimni yoshdek his qilib, talabalik davrlarimni esga oldim. Bizga mana shunday imkoniyatni tuhfa qilgani uchun universitet rektori X.Yunusovga alohida tashakkurimni izhor etaman. Filial talaba-yoshlari qaynoq taassurotlar og‘ushida ushbu kunlarni xotirasiga muhirladilar.