SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Adabiy-ma'rifiy haftaligi doirasida “Milliy qadriyatlar sayli” tashkil etildi

Ma'lumki ayni kunlarda oliy ta'lim muassasalarida adabiy-ma'rifiy haftaligi doirasida “Milliy qadriyatlar sayli” tashkil etilmoqda. Bugun Nukus shahridagi “Istiqlol” bolalar dam olish markazida Samarqand davlat veterinariya meditsinasi, chorvachilik va biotexnologiyalar universiteti Nukus filiali tomonidan ushbu haftalik doirasida ma'rifiy tadbir o‘tkazildi. Tadbir boshida Yoshlar bilan ishlash, ma'naviyat va ma'rifat bo‘limi boshlig‘i A.Seytkamalov va Respublika bolalar kutubxonasi direktorining o‘rinbosari Z.Rambergenova qatnashchilarni qutlab, tadbirning ahamiyati haqida so‘z yuritdi. Shundan so‘ng filial talaba-yoshlari hamda Respublika "Barkamol avlod" bolalar maktabi o‘quvchilari ishtirokida ko‘ngilochar konsert dasturi namoyish etildi.

Konsert davomida qadriyatlarimizni o‘zida tarannum etuvchi kuy-qo‘shiq va qiziqarli chiqishlar namoyish etildi. Tadbir doirasida talabalar ishtirokida ota-bobolarimiz o‘ynab kelgan qadimiy milliy o‘yinlarimiz o‘ynalib, o‘zgacha zavq olishdi. Shuningdek milliy buyumlar ko‘rgazmasi tashkil etilib tadbir ishtirokchilari hunarmandlar tomonidan yasalgan ajoyib narsalardan bahramand bo‘lishdi.

Milliy urf-odatlarimizni va qadriyatlarimizni o‘zida aks ettirgan ushbu tadbir davomida ishtirokchilar milliy liboslarda sayl qilishdi. Bir so‘z bilan aytganda haqiqiy milliy qadriyatlar sayli atmosferasi yaratilib, yig‘ilganlar ushbu ajoyib muhitni qalban his qilishdi. Tadbirning yakuniy qismida faol ishtirok etganlar fahriy yorliq bilan taqdirlandi.