SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Talabalar tanlovda qishloq xo‘jaligi bo‘yicha yangi loyihalarni taqdim etishdi

Bugun Samarqand davlat veterinariya meditsinasi, chorvachilik va biotexnologiyalar universiteti Nukus filialida «Yoshlar va innovatsion qishloq xo‘jaligi» tanlovining saralash bosqichi o‘tkazildi. Qishloq xo‘jaligi sohasida yoshlarning yangi, kreativ g‘oyalarini qo‘llab-quvvatlash, yangi loyihalarini amalga oshirishlari uchun motivatsiya berish, sohada ilg‘or va tashabbuskor yoshlar uchun imkon yaratib berish maqsadida tashkil etilgan mazkur tanlov tom ma'noda talaba-yoshlarni qishloq xo‘jaligi sohasida innovatsion g‘oyalarni joriy etishga jalb etadi. F

ilial talaba-yoshlari orasida o‘tkazilgan tanlovda ishtirok etish va ishtirokchilarni baholab borish uchun O‘zbekiston "Agrar soha ayollari" uyushmasi raisi Adiba Axmedjanova hamda Qishloq xo‘jaligi bo‘yicha BMTTD loyihasining targ‘ibot va tashviqot masalalari bo‘yicha xodimi Otabek Eshmatovlar tashrif buyurdi. Tadbir avvalida filial direktori A.Esimbetov va A.Axmedjanovalar so‘zga chiqib, o‘tkazilayotgan tanlovning talaba-yoshlar uchun nechog‘lik ahamiyatli ekanligini qayd etib o‘tishdi.

Jami 4 shart asosida o‘tkazilgan tanlovga «Veterinariya va zooinjeneriya» fakultetida tahsil olayotgan talabalardan tarkib topgan 5 ta jamoa qatnashdi. Ishtirokchilar o‘z chiqishlari davomida qishloq xo‘jaligi sohasini rivojlantirishga oid loyihalarni taqdim etishdi. Hakamlar hay'ati a'zolari loyihaning bugungi kunda dolzarbligi, ilgari surilayotgan g‘oyaning muhimligiga alohida e'tibor qaratdi. Barcha jamoalar 4 shart davomida faollik ko‘rsatib, o‘zlarining bilim va iqtidordarini namoyon qilishga astoyidil intilishdi. Ijobiy muhit yaratilgan tanlovning yakuniy natijalariga ko‘ra, «Zooinjeneriya» kafedrasining «Kelajak yoshlari» jamoasi 1-o‘rinni egallab, tanlov g‘olibiga aylandi. «Iqtisodiyat va gumanitar fanlar» kafedrasining «Yosh buxgalterlar» jamoasi 2-o‘rinni egallagan bo‘lsa, "Veterinariya meditsinasi va oziq-ovqat xavfsizligi" kafedrasining «Kelajak umidlari» jamoasi 3-o‘rinni egallashga muvaffaq bo‘ldi. Tadbir yakunida A.Axmedjanova so‘z olib, tadbir atmosferasini qalban his qilganligi va ishtirokchilarning intilishlari munosib baholanganligini alohida ta'kidlab o‘tdi. «Yoshlar va innovatsion qishloq xo‘jaligi» tanlovini an'anaviy tarzda o‘tkazib borishni yo‘lga qo‘yish orqali soha bo‘yicha kreativ g‘oyalarni ilgari surayotgan yoshlarni qo‘llab-quvvatlash va motivatsiya berish mumkinligini qayd etdi. G‘olib jamolarga diplom va sovg‘alar topshirildi.