SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«O‘zbekiston –umumiy uyimiz!» shiori ostidagi tadbir ko‘tarinki ruhda o‘tkazildi

Ma'lumki joylarda «O‘zbekiston –umumiy uyimiz!» shiori ostida festival tadbirlari ko‘tarinki ruhda o‘tkazilmoqda. Jumladan, joriy yilning 3-may kuni Samarqand davlat veterinariya meditsinasi, chorvachilik va biotexnologiyalar universiteti Nukus filialida ushbu shior ostida «Bobolarimizning boy merosi va milliy qadriyatlariga asoslangan kuchli ma'naviyatga tayanamiz!» mavzusida ma'naviy-ma'rifiy tadbir bo‘lib o‘tdi.

Tadbirga tashrif buyurgan mehmonlar non-tuz bilan musiqa sodalari ostida tantanali tarzda kutib olindi. Tadbir avvalida doirasida qozoq, rus, ukrain va koreys madaniy markazlari hamda professor-o‘qituvchilar va talaba-yoshlar tomonidan turli millat vakillarining milliyligini o‘zida aks etgan qo‘l hunari namunalari, milliy buyumlar va rasmlar ko‘rgazmasi tashkil etildi va mehmonlar ko‘rgazmadan bahramand bo‘lishdi. Shundan so‘ng filial majlislar zalida tadbirning ochilish qismida filial direktori Adilbay Esimbetov, Qoraqalpog‘iston Respublikasi Jo‘qorg‘i Kengesi deputati O.Bekbergenov, Nukus shahar Nuroniy jamg‘armasi raisi Q.Qalenderov, “Muhammad Baxiy eshon” jome masjidi imomi Sh.Qudaybergenov, xalq deputatlari Nukus shahar Kengashi deputati O.Saparova, Qoraqalpog‘iston Respublikasi Jo‘qorg‘i Kengesi deputati, O‘zbekiston Yozuvchilar uyushmasi a'zosi N.Matyakupovalar so‘zga chiqib bugungi kunda mamlakatimizda Prezidentimiz tashabbusi bilan amalga oshirilayotgan ezgu harakatlar natijasida 130 dan ortiq millat va elat vakillari hamjihatlikda, inoq yashab kelayotganligi, har bir millatning o‘ziga hos milliy an'analari va urf-odatlarini asrab-avaylashga hamda rivojlantirishga qaratilayotgan alohida e'tibor, bugungidek tinch va osoyishta hayotimizga shukr qilish va tinchlik ulug‘ ne'mat ekanligini anglab yetishimiz nechog‘lik muhim ekanligi haqida gapirib o‘tishdi.

Yig‘ilganlarga joylarda «O‘zbekiston –umumiy uyimiz!» shiori ostida o‘tkazilayotgan tadbirlar xalqimizni, turli millat vakillarini ayniqsa yoshlarni ezgu maqsad yo‘lida birlashtirib, yurtimizdagi tinchlik va ahillikni yanada mustahamlash uchun xizmat qilishi va diniy bag‘rikenglik g‘oyalarini teran anglab yetgan holda Yangi O‘zbekistonni yangi g‘oyalar asosida qurishga hissa qo‘shishga undashi haqida ta'kidlab o‘tildi. Talaba-yoshlar ham so‘zga chiqib o‘z fikrlarini bildirib o‘tishdi. Tadbir davomida O‘zbekiston davlat filarmoniyasi Qoraqalpog‘iston Respublikasi bo‘limi tomonidan konsert dasturi namoyish etildi. Turli millat va elatlarning kuy-qo‘shiqlari, jonli ijro etilib barchaga yaxshi kayfiyat ulashildi. Bugungi tadbirga faol ishtirok etgan qozoq, rus, ukrain va koreys madaniyat markazlari filial rahbariyati tomonidan tashakkurnoma bilan taqdirlandi.Ko‘tarinki ruhta bo‘lib o‘tgan tadbirda barcha raqsga tushib haqiqiy bayram atmosferasi yaratildi.