SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialda Navro‘z shodiyonalari munosib nishonlandi

Azaldan xalqimizga ruhiy-ma'naviy quvvat berib kelgan, barcha birdek intiqlik bilan kutib, katta shodiyona ila qarshi oladigan, ko‘nglimiz gavhari Navro‘z ayyomining bayramona kayfiyati hali ham yurtimiz bo‘ylab kezib yuribdi. Jumladan, bugun Samarqand davlat veterinariya meditsinasi, chorvachilik va biotexnologiyalar universiteti Nukus filialida "Olam nurga to'lsin sen bilan, Navro‘z" shiori ostida bayram kechasi yuqori saviyada tashkil etildi. Dastlab, tadbir doirasida milliy taomlar ko‘rgazmasi tashkil etilib, dasturxonga milliy taomlar tortildi.

Tashrif buyurgan mehmonlar noz-ne'matlarni tatib ko‘rib, baho berishdi. Talaba-yoshlar o‘rtasida milliy o‘yinlar bo‘yicha musobaqa o‘tkazildi. Tadbirning kirish qismida filial direktori A.Esimbetov va Qoraqalpog‘iston Respublikasi Vazirlar Kengashi Raisining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari B.Otemuratovlar so‘zga chiqib, bayram munosabati bilan yig‘ilganlarni samimiy tabriklab, xalqimizning beg‘ubor orzu-umidlari, ezgu istaklari, his-tuyg‘ularini tarannum etadigan ushbu ulug‘ ayyomni munosib tarzda nishonlash an'anaga aylanganganligi, Navro‘z yoshlarni do‘stlik, insoniylik, mehir-muruvvatli bo‘lish kabi ezgu fazilatlarga ega bo‘lishga chorlaydigan bayram ekanligi haqida to‘xtalib o‘tdilar.

Bayram kechasi filialning taniqli «Qarekenshe online» jamoasi tomonidan tayyorlangan qiziqarli konsert dasturi bilan davom etdi. Urf-odat va an'analarimizni aks etgan chiqishlar, milliy liboslar ko‘rgazmasi, baxshi va jirovlar tomonidan ijro etilgan kuy-qo‘shiqlar barchaga birdek xushkayfiyat bag‘ishladi. Ayniqsa, o‘zbek, qozoq va qoraqalpoq xalqlarining urf-odatlari asosida kelin salomning jonli ijroda qo‘yib berilishi yig‘ilganlarning olqishiga sazovar bo‘ldi. Filialda Navro‘z bayrami ajoyib shodiyona bilan munosib tarzda nishonlandi.