Navro‘z umumxalq bayrami munosabati bilan direktor tabrigi

Assalomu alaykum aziz yurtdoshlar, hurmatli professor-o‘qituvchilar, xodimlar 

Sizlarni yangilanish va bahor ayyomi bo‘lgan Navro‘z bilan samimiy muborakbod etaman! Xalqimiz ushbu bayramni intiqlik bilan kutib, juda ko‘tarinki kayfiyat bilan nishonlaydi. Shahrimizning har bir xonadoniga allaqachon bayram kayfiyati kirib bordi. Shu o‘rinda filialimizda ham Navro‘z shodiyonalari davom etmoqda. Professor-o‘qituvchilar, barcha xodimlar hamda talabalar bilan hamjihatlikda sumalak saylini o‘tkazdik. Avvalambor, mana shu kunlarga yetkazganiga ming shukurlar bo‘lsin. 

Necha asrlardan buyon ajdodlarimiz intizorlik bilan kutib olgan bu qutlug‘ ayyom biz uchun naqadar qadrli va ko‘nglimizga yaqin ekanligini so‘z bilan ta'riflash qiyin. Mana, diyorimiz uzra bahorning, Navro‘zning epkini kezib yuribdi. Barchaning qalbida ezgu niyatlar, yangi kunlardan umid bor. Boisi, Navro‘z biz uchun, avvalo, eng qadimiy, milliyligimizni, qadriyatlarimizni o‘zida mujassam etgan umumxalq bayrami hisoblanadi. Shu bilan birga, o‘zaro mehr-muruvvat, saxovat va o‘zlikni anglash timsolidir. Avvalo, tabiat uyg‘onib, Navro‘z kayfiyati ko‘ngillarni nurafshon qilayotgan shunday baxtli lahzalarga eson-omon yetkanimizning o‘zi biz uchun oliy baxt ekanligini anglashimiz kerak. Hozirgi tinch-osoyishta hayotimizda har bir inson o‘z qalbidagi ezgu tilaklarini, niyatlarini amalga oshirish, hayotga, ota-onasi, yaqinlari bilan do‘stlariga bo‘lgan mehr va muhabbatini bildirishga harakat qiladi. Xalqimizning milliy bayrami – Navro‘z barchamizni insoniylik, vatanparvarlik, mehnatga tarbiyalash, imon-e'tiqod, tinchlikning qadriga yetish, mehr va muruvvatli bo‘lish ruhida tarbiyalashda alohida ahamiyat kasb etadi. Shu bois, bugungi kunda Navro‘z bayramining tarbiyaviy ahamiyati yanada ortib, mustaqil yurtimizning talaba yoshlari qalbida Vatanga muhabbatni shakllantirishdek ulkan vazifani amalga oshirmoqda. Biz hamisha yurtimizda tinchlik va osoyishtalik hukm surishiga, xalqimiz doim bayramlar og‘ushida bo‘lishiga, shu muqaddas diyorimizning tinchligiga ko‘z tegmasligiga mustahkam ishonch bilan qarashimiz lozim. Tinchlik-bizga berilgan eng ulug‘ ne'mat. Atrofimizga qarab, naqadar osmoni musoffa, odamlari beg‘ubor, sokin yurtda farovon hayot kechirayotganimizning guvohi bo‘lamiz. Demak, har kuni shukuronalar keltirishni kanda qilmasiligimiz lozim. Navro‘z bayrami aynan shu shukuronalikni qalbimizga joylab, o‘zi bilan ezgulikni olib keladi. Fursatdan foydalanib, Respublikamiz xalqini, aziz ustozlarni, filial xodimlarini va talaba-yoshlarni yana bir marta Navro‘z umumxalq bayrami bilan ko‘tarinki kayfiyatda, katta mamnuniyat bilan tabriklayman! Iloyim bayram shukuhi har bir xonadonga kirib borib, qalbimizda ezgu niyatlarni uyg‘otsin. Siz orqali har biringizning oilangizga sog‘lik-salomatlik, barakali dasturxoningizga mo‘l risqu nasiba tilayman. Hayotning shirin tashvishlariga ko‘milib, yelib-yugurib yurish barchamizga nasib etsin! Xalqimizning farovonligi yo‘lidagi fidokorona mehnatingizda kuch-quvvat tilayman! Qalbimdagi jamiyki ezgu niyatlarni sizga yo‘llab qolaman. Navro‘z shodiyonasi muborak bo‘lsin!

Hurmat bilan, 

Adilbay Esimbetov,

Samarqand davlat veterinariya meditsinasi, chorvachilik va biotexnologiyalar universiteti

Nukus filiali direktori, biologiya fanlari doktori, professor