Filialda 2023-yil sarhisobi hamda yangi yil bayramiga bag‘ishlangan tadbir o‘tkazildi

Mana ko‘z ochib yumgancha 2023-yil o‘z poyoniga yetmoqda. Ko‘pchiligimiz uchun shirin xotiralarga boy, omadli yil bo‘ldi. Yil yakunida har birimiz o‘tgan kunlarni sarhisob qilib olamiz. Ana shunday Samarqand davlat veterinariya meditsinasi, chorvachilik va biotexnologiyalar universiteti Nukus filialida 2023-yil sarhisobi hamda yangi yil bayramiga bag‘ishlangan tadbir o‘tkazildi. Filial direktori Adilbay Esimbetov tadbir boshida so‘z olib, yig‘ilganlarni yaqinlashib kelayotgan yangi yil bayrami bilan samimiy qutlab, yil davomida erishilgan yutuqlarni e'tirof etib o‘tdi. —Joriy yil filialimiz uchun juda barakali va omadlarga boy yil bo‘ldi. Ilmiy faoliyat deysizmi, sport sohasi va ma'naviy tadbirlarda va tanlovlarda munosib o‘rinlarni egallab muvaffaqiyatlar sari odimlab bordik. Shu yil ilk marta filialda tahsil olayotgan talaba-yoshlar orasida O‘zbekiston Respublikasi Prezidenti stipendiyasi sohibasining chiqishi barchamizga katta quvonch bag‘ishladi. Yil sarhisobini qiladigan bo‘lsak erishilgan ijobiy natijalar juda qoniqarli, yo‘l qo‘yilgan kamchiliklarni esa albatta bartaraf qilib boramiz—dedi direktor A.Esimbetov. Tadbirda yil davomida o‘tkazilgan ma'naviy tadbirlarda faol ishtirok etgan bir guruh yoshlar direktor tomonidan taqdirlandi. Shundan so‘ng talaba-yoshlar tomonidan qiziqarli viktorina o‘yinlari tashkil etildi. Yangi yil tadbiri davomida  O‘zbekiston davlat filarmoniyasi Qoraqalpog‘iston Respublikasi bo‘limi tomonidan "Lektoriy konsert" dasturi namoyish etildi. Turli soz asboblar yordamida jonli ijro qilingan taronalar barchaga yaxshi kayfiyat ulashdi.