“O‘zbek tili – milliy o‘zligimiz va mustaqil davlatchiligimiz timsoli!” shiori ostida badiiy kecha o‘tkazildi

Tadbir boshida  O‘zbekiston va Qoraqalpog‘iston Respublikalarining davlat madhiyalari yangradi. Filial rahbariyati, professor-o‘qituvchilar va talaba-yoshlar ishtirok etgan tadbir boshida  filial direktori Adilbay Esimbetov so‘z olib, Ona tilimiz  jamiyatimiz rivoji hamda  mamlakat taraqqiyotida katta o‘rin egallashi,  jonajon ona tilimizsiz millat kelajagini  tasavvur ham etib bo‘lmasligi, unda barcha milliy qadriyatlarimiz,  millat ruhi va boy tarixi aks etishi haqida  gapirib o‘tdi.

Shundan so‘ng «Iqtisodiyat va gumanitar fanlar»  kafedrasi o‘qituvchisi I.Xalmuratov nutq so‘zlab, so‘nggi yillarda mamlakatimizda o‘zbek tilining nufuzini yanada oshirish va rivojlantirish borasida  amalga oshirilayotgan chora-tadbirlar haqida to‘xtaldi. Badiiy kecha filial yoshlarining «Qarekenshe onlayn» jamoasi tomonidan tayyorlangan konsert dasturi bilan davom etdi.

O‘zbek tilining haqiqiy jozibasini o‘zida namoyon etuvchi teran ma'noga ega she'rlar, milliy tilimizni madh etuvchi yoqimli kuy-qo‘shiqlar, o‘zbek mumtoz adabiyotiga va ona tilimizning rivojiga o‘zining katta hissalariniqo‘shgan yirik namoyondalari talqinida tilimizning sofligini asrashga chorlovchi  ibratli sahnali ko‘rinishlar kechana yanada fayz bag‘ishladi. Iqtidorli talabalarning ajoyib ijrosi zalda o‘tirganlarning qarsaklariga sazovar bo‘lishdi.Ona tilimizni ulug‘lash, uning jozibasi va tarovatini yosh avlodga yetkazish, til sofligiga alohida e'tibor qaratish va ulug‘ sanani munosib nishonlash maqsadida tashkil etilgan bayram kechasi ko‘tarinki kayfiyatda bo‘lib o‘tdi.

Axborot xizmati