«Super baliqlar» fermer xo‘jaligi bilan memorandum imzolandi

So‘nggi yillarda mamlakatimizda baliqchilik sohasini yanada rivojlantirish yo‘nalishida keng imkoniyatlar yaratilib, bu borada samarali ishlar amalga oshirilmoqda. Buning natijasi o‘laroq respublikamizda baliqchilik xo‘jaliklarining soni ko‘payib, soha bo‘yicha yetuk bilimga ega kadrlarga talab ortmoqda. Shularni inobatga olgan holda,  Samarqand davlat veterinariya meditsinasi, chorvachilik va biotexnologiyalar universiteti Nukus filiali va «Super baliqlar» fermer xo‘jaligi o‘rtasida memorandum imzolandi. 

Ushbu memorandumga ko‘ra, endilikda filial talabalarining amaliyot o‘tashi uchun barcha zarur bo‘lgan sharoitlarni yaratish, ularning ishlab chiqarish va bitiruv oldi amaliyotlarini yuqori darajada tashkil etish bo‘yicha birgalikda ish olib borish, kafedra o‘qituvchilari va fermer xo‘jalik xodimlari soha bo‘yicha fikr almashishni yo‘lga qo‘yish,  hamkorlik aloqalarini yanada mustahkamlash va shu orqali tarmoq bo‘yicha yangi g‘oyalar asosida samarali natijalarga erishish, ushbu yo‘nalishda tahsil olayotgan talabalarning amaliy ko‘nikma va tajribalarini rivojlantirish va malakasini oshirish hamda o‘zaro hamkorlik aloqalarini kengaytirish ko‘zda tutilgan. 

«Super baliqlar» fermer xo‘jaligi bilan hamfikrlikda ish olib borish, hamkorlik munosabatlarini o‘rnatish orqali kelgusida ijobiy natijalarga erishish belgilab olindi. Shuningdek, ushbu xo‘jalik To‘rtko‘l tumanida joylashganligi uchun amaliyotchi talabalarga har tomonlama qulaylik yaratish maqsadida yotoqxona qurib berish rejalashtirilmoqda.  Albatta, bu o‘z o‘rnida filial talabalari uchun beqiyos imkoniyatlarni yaratib beradi. 

Hozirgi kunda xo‘jalikning inkubasiya sexida baliqlarni parvarish qilish va lichinkalarini rivojlantirish uchun maxsus jihozlar va zarur sharoitlar mavjud. Talabalarimiz bugungi kunga qadar bu yerda amaliyot o‘tab, yaxshigina amaliy ko‘nikmalarga ega bo‘lishgan. Ushbu imzolangan memorandum baliqchilik tarmog‘ini yanada rivojlantirish va soha bo‘yicha yetuk bilim hamda tajribaga ega kadrlarni tayyorlashda mustahkam zamin yaratib beradi. Talabalarimiz o‘zlari uchun yaratilgan shunday imkoniyatdan unumli foydalangan holda, salmoqli ishlarni amalga oshirib, yaqin kelajakda  baliqchilik sohasi rivojiga munosib hissa qo‘sha olishiga aminmiz.