Янги йилда барчамизнинг янги умидларимиз ва беғубор орзуларимиз амалга ошсин
Ассалому алайкум, ҳурматли профессор-ўқитувчилар ҳамда азиз талаба-ёшлар!
Кўз очиб юмгунча 2022 йилни якунлаб, янги 2023 йилга қадам қўйиш арафасидамиз. Яқин фурсатлар ичида кириб келишга шай турган янги йил байрами билан сизларни ва сиз орқали оила аъзоларингизни самимий табриклаш ва қалбимдаги энг эзгу тилакларни изҳор этиш бахтига муяссар бўлганим учун аввало, Яратганга беҳисоб шукрлар келтираман. Юртимизга кириб келаётган янги йилда барчангизга сиҳат-саломатлик, қордек оппоқ орзулар, олий мақсадлар ва янгиланишлар, буюк зафарлар ва омадлар тилайман!
Албатта, ҳар биримиз йил якуни сарҳисобини қилар эканмиз, эришилган ютуқларга мамнунлик ҳис қилсак, бой берилган имкониятларимиздан тегишли хулоса чиқариб, сабоқ оламиз. Ўтиб бораётган «Инсон қадрини улуғлаш ва фаол маҳалла йили» филиалимиз учун муввафақиятли ва ўта баракали йил бўлди. 2022 йил мобайнида филиал жамоаси томонидан амалга оширилган салмоқли ислоҳотлар ва самарали натижалар йил якунида бизни қувонтирмоқда.
Жумладан, жорий ўқув йилида биринчи марта филиалимизда магистратура бўлими очилганлиги ҳамда бакалавриат таълим йўналишида 4 та янги мутахассислик очилиб, ҳозирги кунда жами талабалар сони 1206 нафарга етиши биз учун чин маънода янгилик бўлди. Ўқишга қабул қилиш кўрсаткичи ва хужжат топширган абитуриентлар сони ошди. Ўз ўрнида профессор-ўқитувчиларимизнинг ҳам сони ортиб, жорий ўқув йилида янгидан «Ҳайвонлар анатомияси, физиологияси ва биокимёси» кафедраси ташкил этилди. Шунингдек, илмий салоҳиятимиз ҳам сезиларли даражада оширилди. «Зооинженерия» кафедраси ассистенти Султанов Юсуфбек Файзуллаевич “Қорақалпоғистон думбали қўйларнинг маҳсулдорлик ва биологик ҳусусиятлари” мавзусида қишлоқ хўжалиги фанлари бўйича фалсафа доктори (PhD) диссертациясини муваффақиятли ҳимоя қилди.
Талабаларга сифатли таълим беришга алоҳида эътибор қаратилиб, филилга замонавий лаборатория жиҳозлари келтирилди. Бир қатор нуфузли хорижий ОТМлари билан шартномалар тузишга эришилди. Шунингдек, жорий йил биринчи марта хорижий олий ўқув юрти билан тажриба алмашиш асосида дарс ўтиш йўлга қўйилди. Жумладан, Қозоғистон Республикасининг “QS World University Rankings” 500 талигига кирадиган Қозоғистон миллий аграр тадқиқот университетининг «Микробиология ва вирусология» кафедрасининг профессори Мықтыбаева Рая Жақсыгуловна томонидан филиал талаба-ёшларига мутахассислиги бўйича дарс ўтилди. Талабаларга таълим беришда назарий ва амалий билимлар уйғунлигига алоҳида эътибор қаратилди. Фермер хўжаликлари ва корхоналар билан шартномалар тузилди. Бир қатор ўқитувчиларимиз хорижий тилни билиш даражаси бўйича сертификатларни қўлга киритди. Албатта, булар замирида бўлажак ёш мутахассисларни етук кадрлар қилиб етиштириш сингари эзгу мақсад мужассам.
Маълумки, сўнгги йилларда Муҳтарам Президентимиз ташаббуси билан давлат органлари ва ташкилотларида ахборот хизматлари фаолиятини ривожлантиришга алоҳида эътибор қаратилиб келинмоқда. Шу ўринда филиалда жорий йил Матбуот хизмати томонидан амалга оширилган салмоқли ишларга алоҳида урғу бериб ўтишни жоиз деб биламан. Филиал фаолиятига оид ҳар қандай янгиликлар расмий веб-сайтимиз, ижтимоий тармоқлардаги расмий саҳифаларимиз ҳамда республикадаги таниқли интернет нашрларида газета, радио ва телевидение орқали оператив турда кенг ёритиб борилди. Матбуот котибимиз ташаббуси билан «Қарақалпақстан» телеканалида жуда кўплаб чиқишлар ташкил этилди. Ҳар бир байрам санаси «Қарекеӊше онлайн» жамоаси иштирокида юқори савияда нишонланиб келди. Бир сўз билан айтганда йил давомида филиал матбуот котиби фаоллик билан иш олиб борди. Шунингдек, филиалда маънавият ва маърифат ҳамда спорт соҳаси бўйича ҳам салмоқли ишлар амалга оширилди десам муболаға бўлмайди. Талаба-ёшларимиз қатор маънавий йўналишдаги танлов ғолиблари бўлишди, спорт мусобақаларида ижобий натижаларни қўлга киритди, ҳайрия акциялари мунтазам равишда ташкил этилиб, маҳаллалар билан тизимли иш олиб борилди. Шу ўринда талабалар қўлга киритган ютуқларни келтириб ўтадиган бўлсам, жорий йилнинг 16-19-декабрь кунлари Қозоғистон Республикаси Чимкент шаҳрида “Ўзбек жанг санъати” спорт тури бўйича Осиё чемпионатида Ветеринария-санитария экспертизаси йўналиши 2-босқич 215-гуруҳ талабаси Серимбетова Камилабану Тенелбаевна 3-ўринни эгаллаб бронза медалини қўлга киритди. Албатта бу биз учун жуда қувонарли янгилик бўлди.
Йил якунида эса 2022/2023-ўқув йили учун Ўзбекистон Республикаси Президенти ва номдор давлат стипендиялар ғолиблари эълон қилиниб, Республика олий таълим муассасалари бакалавриат босқичида таҳсил олаётган 566 нафар номдор стипендия соҳиблари орасида Самарқанд давлат ветеринария медицинаси, чорвачилик ва биотехнологиялар университети Нукус филиалининг 3 нафар талабаси ҳам бор эканлиги биз учун ажойиб янгилик бўлди. Жумладан, 3-босқич талабаси Атаниязов Сапарнияз Барликбаевич Ислом Каримов номидаги давлат стипендияси соҳиби бўлган бўлса, 3-босқичда таҳсил олаётган Кушенова Ўғилхон Курбанбаевна Ибройим Юсупов номли давлат стипендияси ҳамда 3-босқич талабаси Алламуратова Бибизада Кадирбай Тўлепберген Қаипбергенов номли давлат стипендиясибилан тақдирланди. Яна бир айтиб ўтиш лозим бўлган ютуқлардан бири «Ветеринария медицинаси ва озиқ-овқат хавфсизлиги» кафедрасининг ассистент-ўқитувчиси М.Сагизбаев ва Ёшлар билан ишлаш, маънавият ва маърифат бўлими бошлиғи А.Сейткамалов ҳамда филиал директори сифатида ўзим “Ўзбекистон Республикаси Конституциясининг 30 йиллиги” эсдалик нишони билан тақдирланишга муяссар бўлдик.
Мазкур рўйхатни яна давом эттирса бўлади. Йил якунида эришилган натижаларнинг бир чимдимини камторона тарзда сизларга илингим келди. Муҳими филиал жамоаси катта зафарлар сари аҳиллик билан кичик қадамлар ила одимлаб бормоқда. Олий мақсадимиз эса ёш мутахассисларга сифатли ва етук билим бериш эканлигини ҳар доим бот бот такрорлайман.
Муҳтарам юртдошлар, азиз филиал жамоаси ҳамда талаба-ёшлар барчангизни мўъжизавий байрам муносабати билан позитив кайфиятда табриклайман!
Ҳар бирингизга сиҳат-саломатлик, оилавий хотиржамлик ва катта мақсадларингизни амалга оширишда кўтаринки руҳ ва шижоат тилайман! Кўзлаган манзилингизга дадил қадамлар билан етиб боришингизни, кўнгил хотиржамлиги, ажойиб янгиланишлар ва қалб поклигини тилайман! Илойим кириб келаётган 2023 йил барчамизга қутлуғ ва омадли йил бўлсин! Байрамни кўтаринки кайфият билан оила даврасида файзли дастурхон атрофида нишонлаш барчамизга насиб этсин! Ҳаммангизга чинакам байрам кайфиятини тилаб қоламан!
СамДВМЧБУ Нукус филиали директори,
биология фанлари доктори, доцент
Есимбетов Адилбай Тлепович
скачать dle 12.1
Telefon
E-mail
