Халқаро талабалар куни муносабати билан байрам табриги
Талабалик—умр кундалигимизнинг ёрқин саҳифаларини безайдиган бетакрор давр. Энг беғубор орзуларимиз руёби мана шу давр билан боғлиқ.
Бугун мамлакатимизда ёшларга яратиб берилаётган кенг имкониятлар замирида Давлатимиз раҳбарининг ёш авлод тақдирига бефарқ эмаслиги, уларга ҳар доим мотивация бағишлаб, қўллаб-қувватлаши каби юксак эътибор мужассам. Олий ўқув юртида таҳсил олаётган минглаб талаба-ёшлар бизнинг эртанги кунимизни ҳамда истиқболимизни белгилаб берувчи муҳим қатлам ҳисобланади. Талабаларнинг эришаётган ютуқлари, улкан марраларни забт этишга бўлган иштиёқини кўриб, жуда хурсанд бўламан. Гоҳида улардаги жўшқинлик ва ёшликка хос бўлган кучли шижоатидан ўзимга мотивация оламан. Жамиятимизда ўз ўрнига эга бўлган талаба-ёшлар ҳар доим диққат марказида бўлиб келмоқда. Улар иштирокида ташкил этиб келинаётган кўплаб тадбирлар муҳим аҳамиятга эгалиги билан ажралиб туради. Ҳозирда филиалимизда жами 1213 нафар талаба таҳсил олмоқда. Улар орасида билимга чанқоқ, қобилиятли, интилувчан алоҳида иқтидорга эга бўлганлар сони йил сайин ортиб бораётганлиги биз учун катта қувонч.
Филиал талабаларининг билимларини мустаҳкамлаш билан бирга уларнинг қобилиятларини юзага чиқариши учун кулай имкониятларни яратиш муҳим вазифаларимизга киради. Уларни доимий равишда руҳлантириб бориш, Янги Ўзбекистонни барпо этиш йўлида ташаббускорлик кўрсатишлари учун ҳар томонлама қўллаб-қувватлаш зарур деб ўйлайман. Шунингдек, иқтидорли ёшларни рағбатлантириб бориш ҳам уларнинг янгидан янги ғояларни илгари суришга катта мотивация бўлади. Сўзимнинг исботи сифатида филиалимизда Ахборот хизмати раҳбари З.Хожамуратованинг ташаббуси билан билимли, қобилиятли, иродали ва шижоатли ёшларидан ташкил топган «Қарекеӊше онлайн» жамоасини келтириб ўтмоқчиман. Улар ҳар доим ўзларининг креатив ғоялари билан катта байрам дастурларини ташкиллаштириб келмоқда. Шунингдек, ажойиб тарзда видеороликларни тайёрлаб ОАВ орқали кенг ёритиб келмоқда. Улар аллақачон ўзларининг интилишлари ва самарали меҳнатлари натижасида кенг жамоатчилик эътибор ва меҳрини қозониб улгуришди. Шахсан ўзим мана шундай талаба-ёшларни қўллаб-қувватлаб, уларни рағбатлантириб бориш учун барча имкониятларимни ишга солишга ҳаракат қиламан. Боиси, айнан шу каби ёшлар ўз билими ва салоҳияти билан мамлакатимиз тараққиёти учун ўзларининг муносиб ҳиссаларини қўшиб, миллат келажагини ижобий томондан белгилаб беради.
Халқаро талабалар куни дунё бўйлаб кенг нишонланиб келмоқда. Юртимизда ҳам ушбу байрам муносиб тарзда белгиланиб, талаба-ёшларга ҳурмат ва эҳтиром кўрсатилади. Фурсатдан фойдаланиб, Республикамиздаги барча талаба-ёшларни, қолаверса, филиалнинг азиз талабаларини бугунги ажойиб байрам муносабати билан самимий муборакбод этаман! Янги Ўзбекистонимизнинг эртанги кунини сиз азиз ёшлар белгилаб берасиз. Сизларга қалбимдаги энг беғубор ва эзгу тилакларимни билдираман. Ўқишларингизда муваффақиятлар тилаган ҳолда, фақат ва фақат улкан марраларни забт этишингизга тилакдошман. Сиз талаба-ёшлар ўта замонавий, юксак маданиятли ва етук билимга эга шахс бўлиб шаклланиб боришингиз учун биз бор куч-ғайратимизни сафарбар этишга тайёрмиз. Сизлар учун катта мотивация бу-ўзингиз. Ҳар бир ютуқ орқасида ўзингизнинг машақатли меҳнатингиз самараси ва интилишларингизнинг ижобий натижаси кўринади. Ҳар бирингизга мустаҳкам соғлик ва сўнмас шижоат тилайман! Байрам муборак азиз, талабалар!
Ҳурмат билан,
Адилбай Есимбетов
Биология фанлари доктори, доцент
СамДВМЧБУ Нукус филиали директори
скачать dle 12.1
Telefon
E-mail
