Филиалга Қозоғистон миллий аграр тадқиқот университетининг профессори ташриф буюрди

Бугун Самарқанд ветеринария медицинаси, чорвачилик ва биотехнологиялар университети Нукус филиалига Қозоғистон Республикасининг “QS World University Rankings” 500 талигига кирадиган Қозоғистон миллий аграр тадқиқот университетининг «Микробиология ва вирусология» кафедрасининг профессори Мықтыбаева Рая Жақсыгуловна ташриф буюрди. Ҳурматли меҳмонни филиал директори А.Есимбетов қабул қилди. Ўқув ишлари бўйича директор ўринбосари Қ.Атаназаров, Қорақалпоғистон Республикаси Ветеринария ва чорвачиликни ривожлантириш қўмитаси раиси ўринбосари Қ.Пирназаров, «Ветеринария ва озиқ-овқат хавфсизлиги» кафедраси мудири Ш.Авезимбетов ҳамда директор маслаҳатчиси З.Сапарбаев иштирокида давра суҳбати олиб борилди. Меҳмон билан бўлиб ўтган мулоқот давомида ўзаро тузилган икки томонлама шартнома асосида ўзаро тажриба алмашиш, ҳамкорликда иш олиб боришни ижобий йўлга қўйиб, алоқаларни янада мустаҳкамлаш, шунингдек, филиалдаги ўқув жараёнлари билан яқиндан танишиш, талабаларга мутахассислиги бўйича билим ва кўникмаларни бериб бориш каби муҳим масалалар муҳокама қилинди. Шартномага асосан, Р.Мықтыбаева «Ветеринария ва озиқ-овқат хавфсизлиги» кафедрасида «Ветеринария микробиологияси ва иммунологияси» фанидан филиал талабаларига жами 30 соат дарс ўтиб бериши режалаштирилди. Қозоғистондан ташриф буюрган профессор талабаларга ҳам назарий ҳам амалий билим ва кўникмаларни бериб боради. Шунингдек, лаборатория машғулотлари ҳам олиб борилади. Суҳбатнинг расмий қисми якунлангач, директор А.Есимбетов ҳамда Р.Мықтыбаевалар ўзаро самимий суҳбат олиб борди. Шундан сўнг меҳмон ҳурмат тариқасида суҳбат иштирокчиларига Қозоғистондан келтирилган совғаларни топширди. Профессорнинг самимияти ва филиал раҳбариятига кўрсатган ҳурмати учун А.Есимбетов ўзи ва бошқалар номидан ташаккур билдирди. Шунингдек, мулоқот давомида ўзаро ҳамкорлик истиқболлари муҳокама қилинди. Маълумот учун, Қозоғистон миллий аграр тадқиқот университетининг профессори Р.Мықтыбаева жорий йилнинг 31 октябрь санасидан 6 ноябрга қадар филиалимизда бўлиб, талаба-ёшларга мутахассислиги бўйича дарс ўтади.