Филиал профессор-ўқитувчилари ҳар доим эътиборда ва эъзозда

Самарқанд давлат ветеринария медицинаси, чорвачилик ва биотехнологиялар университети Нукус филиалида 1 октябрь – Ўқитувчи ва мураббийлар кунига бағишланган байрам тадбири кўтаринки руҳда бўлиб ўтди. Унда Қорақалпоғистон Республикаси Ветеринария ва чорвачиликни ривожлантириш қўмитаси раисининг ўринбосари Қ.Пирназаров, филиал профессор-ўқитувчилари ва ходимлар ҳамда талаба-ёшлар иштирок этишди. Тадбир бошида филиал директори Адилбай Есимбетов сўз олиб, Республикамиздаги барча фахрий устозларни ва филиалнинг фидойи профессор-ўқитувчиларини самимий муборакбод этди. У ўз нутқида  «Ўқитувчи шарафли касб эканлигини ҳаммамиз жуда яхши биламиз. Бу шарафли касб эгаларини қанча эъзозласак, шунча камдек туюлаверади. Ахир, уларнинг зиммасида келажагимиз эгалари бўлган навқирон авлодни тарбиялашдек муҳим бир вазифа бор» дея таъкидлаб ўтди.

Байрам кечасига меҳмон сифатида ташриф буюрган Қ.Пирназаров ҳам сўзга чиқиб, ўз самимий тилакларини билдирди. Табрик сўзларидан сўнг филиал профессор-ўқитувчиларини тақдирлаш маросими бўлиб ўтди. Унда Ўзбекистон Республикаси Олий ва ўрта махсус таълим вазирлиги, Ўзбекистон Республикаси Ветеринария ва чорвачиликни ривожлантириш давлат қўмитаси ҳамда Қорақалпоғистон Республикаси Ветеринария ва чорвачиликни ривожлантириш қўмитаси ва филиал раҳбарияти томонидан бир қатор фидойи ўқитувчиларга фаҳрий ёрлиқ ва эсдалик совғалари топширилди. Расмий маросимлардан сўнг байрам кечасининг бадиий қисми бошланди. 

Филиалимизнинг шўх йигит-қизларидан таркиб топган «Қарекеӊше онлайн» жамоаси томонидан тайёрланган қизиқарли концерт дастури намойиш этилди. Тантанали байрам кечаси жуда кўтаринки кайфиятда бўлиб ўтди. Айниқса устозлар учун махсус тайёрланган қўшиқ барчага бирдек манзур бўлди. Филиалимизда устозларга юксак ҳурмат кўрсатишга ва уларни рағбатлантиришга алоҳида эътибор қаратилганлиги яна бир марта ўз исботини топди.