Талабалик бахтига мушарраф бўлган бахтиёр ёшлар таассуротлари

Талабалик—ҳаётимизнинг энг беғубор, ёқимли ҳис-туйғуларга бой даври ҳисобланади. Ушбу дамларнинг ҳар бир лаҳзаси ширин хотиралар бўлиб қалбимизга муҳирланиб қолган. Талабалик бахти ҳаммага ҳам бирдек насиб қилавермайди. Тинмай ҳаракатда бўлиб, меҳнат қилган ёшларгина талаба деган номга сазовор бўла олади. 2022-2023 ўқув йилида кириш имтиҳонларда энг юқори балл тўплаган ва Самарқанд давлат ветеринария медицинаси, чорвачилик ва биотехнологиялар университети Нукус филиалининг талабаси бўлиш бахтига мушарраф бўлган ёшларнинг шодлиги ва ҳаёжонини сизлар билан баҳам кўргимиз келди. 

–Жорий йил мен учун жуда омадли келди, олий ўқув юртининг талабаси бўлдим. Энг юқори балл тўплаган талабалар орасидан биринчилардан бўлиш қувончимга қувонч бағишлади –дейди Бухгалтерия ҳисоби ва аудит (тармоқлар бўйича) йўналишининг 1-босқич талабаси Сабира Муратбаева–Менга тақдим этилган ажойиб имкониятдан унумли фойдаланишга ва ота-онам ҳамда устозларимнинг ишончини оқлашга астойидил интиламан.

–Ветеринария диагностикаси ва лаборатория ишлари йўналишига грант асосида талабаликка қабул қилиндим. Албатта бу мени ва ота-онамни беҳад хурсанд қилди. Мамлакатимизда олий таълим соҳасида олиб борилаётган изчил ислоҳотлар биз сингари талаба бўлишни орзу қилган ёшларга янада мотивация бағишлайди –дейди Бибинур Базарбаева.

–Давлатимиз раҳбари биз ёшларга катта ишонч билдириб, етук билим олишимиз учун кенг имкониятларни яратиб бермоқда. Мен бундан руҳланган ҳолда ўзим ўқишни ният қилган олий ўқув юрти – Самарқанд давлат ветеринария медицинаси, чорвачилик ва биотехнологиялар университети Нукус филиалига ҳужжат топширдим ва юқори балл тўплаб талабага айландим. Келажакда Ветеринария ва чорвачилик соҳаси ривожида ўз ҳиссамни қўша олишимдан ўта мамнунман –дейди Аллияр Курбашов.

–Талабалик бахтига эришганим улуғ байрамимиз– Ўзбекистон Республикаси Давлат мустақиллигининг ўттиз бир йиллик байрами арафасида оилам ва мен учун қўшалоқ қувонч, катта бир совға бўлди–дейди Молдир Махмудова–Энди қаддимни янада баланд тутиб, талабалар сафида юраман ва ушбу олийгоҳда ўқитувчилар берган билимларни яхши ўзлаштириб фаол талабалар қаторидан жой олишга ҳаракат қиламан.

–Мен мустақил юртнинг бахтли талабасига айландим. Бунинг учун аввало, чексиз шукуроналар келтираман ва ота-онам ҳамда устозларимга миннатдорчилигимни изҳор этаман. Талабалар сафидан жой олган биз ёшлар келгусида зиммамиздаги юксак маъсулиятни чуқур ҳис қилган ҳолда, талаба деган номга муносиб бўлишимиз керак деб ўйлайман. Мен албатта фаол талаба бўлишга интиламан –дейди Тумариса Мирзабаева.

Филиал талабаларининг илк ҳаёжонли таассуротлари сизларга манзур бўлди деб умид қиламиз. Мамлакатимиздаги талаба бўлиш сингари беғубор орзулари руёбга чиққан барча талабаларни муборакбод этамиз! Ҳаётингизнинг янги саҳифаси ёрқин хотиралар билан безалиши, талабалик кундалигингиз ажойиб дамлар таассуротлари билан тўла бўлишини тилаб қоламиз!