Филиалда “Талабаликка бағишлов” тадбири бўлиб ўтди

Барча олий таълим муассасаларида янги 2022-2023 ўқув йили кўтаринки кайфият билан бошланди. Бугун 6 сентябрь куни Самарқанд давлат ветеринария медицинаси, чорвачилик ва биотехнологиялар университети Нукус филиалида "Янги Ўзбекистонда эл азиз, инсон азиз!" шиори остида “Талабаликка бағишлов” тадбири бўлиб ўтди. Филиал директори Есимбетов Адилбай Тлепович тадбирни кириш сўзи билан очиб бериб, барчани Ўзбекистон Республикаси Давлат мустақиллигининг ўттиз бир йиллик байрами ҳамда билимлар куни билан табриклади. Шунингдек, ушбу тадбирда Қорақалпоғистон Республикаси Ветеринария ва чорвачиликни ривожлантириш қўмитаси раисининг ўринбосари Қ.Пирназаров, Самарқанд давлат ветеринария медицинаси, чорвачилик ва биотехнологиялар университети «Ветеринария профилактикаси ва даволаш иши» факультетининг декани,  Ветеринария фанлари доктори, профессор Х.Ниёзов, қишлоқ хўжалиги фанлари номзоди, доцент Р.Рузимкулов ва ота-оналар сўзга чиқиб, талабалик бахтига муяссар бўлган ёшларни табриклади ҳамда сўнгги йилларда олий таълим соҳасида эришилган ютуқларга тўхталди. 

Тадбир давомида кириш имтиҳонларда энг юқори балл тўплаган талабаларга талабалик гувоҳномаси филиал директори томонидан тантанали равишда топширилди. “Талабаликка бағишлов” тадбири талаба-ёшлар иштирокида ташкиллаштирилган концерт дастури билан давом этди. Катта мақсадлар билан олийгоҳ остонасига илк қадам қўйган ёшларни янги ўкув йили билан табриклаган ҳолда, уларнинг ўқишларида катта муваффақиятлар тилаймиз!