Меҳнат фаҳрийлари ёшларимизнинг маънавий устози шиори остида учрашув ўтказилди

Жорий йилнинг 19 май куни Самарқанд давлат ветеринария медицинаси, чорвачилик ва биотехнологиялар университети Нукус филиалида «Меҳнат фаҳрийлари ёшларимизнинг маънавий устози» шиори остида Ички ишлар органлари фаҳрийси Ф.Саникбаев ва фаҳрийлар Кенгаши раиси О.Турдаховлар билан учрашув ташкил этилди. Дастлаб ҳурматли меҳмонларни филиал директори Адилбай Есимбетов кутиб олиб, нуронийларга ҳурмат ва эҳтиром кўрсатди. Улар билан самимий суҳбат олиб борар экан, филиал фаолияти ва талаба-ёшлар таълим-тарбияси ҳақида тўхталиб ўтди. Фаҳрий меҳмонларга ҳурмат белгиси сифатида эсдалик совғасини топширди. Шундан сўнг меҳмонлар иштирокида мажлислар залида талаба-ёшлар билан учрашув ўтказилди. Ёшлар масалалари ва маънавий-маърифий ишлар бўйича директор ўринбосари С.Ганиев сўз олиб, бугунги учрашувнинг мазмун ва моҳияти ҳақида гапириб ташриф буюрган меҳмонлар билан таништириб ўтди. Нуронийлар сўзга чиқиб, ўзларининг ёрқин хотираларини, ҳаёт йўли ва иш тажрибаларини ёшларга гапириб берди. — Ёш ва шижоатга тўлган даврингизда таълимни чуқур ўзлаштириб, мақсадларингиз сари интилинг, ҳеч қачон дангасалик қилманг. Унутманг, бугунги қилган меҳнатингиз ўз келажагингизни яратиб беради — дейди фаҳриймиз Ф.Саникбаев. Талаба-ёшлар мазмунли ва самимий мулоқот давомида меҳмонларнинг ўгитларини қунт билан тинглаб, ўзларини қизиқтирган саволлар бўйича уларга ҳурмат билан мурожаат этишди. Тадбир якунида нуроний отахонларимиз кексалик гаштини суриб юриш барчага насиб этишини тилаб дуо қилди. Бугунги учрашув чин маънода мазмунли тарзда бўлиб ўтди.