Миллий спорт турлари бўйича «Директор кубоги» мусобақаси ўтказилди

Самарқанд давлат ветеринария медицинаси, чорвачилик ва биотехнологиялар университети Нукус филиали талаба-ёшлари орасида миллий спорт турлари бўйича «Директор кубоги» мусобақаси ўтказилди. Жумладан, турникка тортилиш, арқон тортиш ва тош кўтариш спорт турларини ўз ичига олган ушбу мусобақада жами 11та  жамоадан ташкил топган қарийб 60га яқин талаба-ёшлар иштирок этишди. Қизғин баҳс ва мунозараларга бой кечган беллашувларда талабалар шижоат билан қатнашди. Мусобақа якунида тантанали тақдирлаш маросими ташкил этилди. Филиал директори Адилбай Есимбетов тадбир бошида сўз олиб, талаба-ёшлар орасида соғлом турмуш тарзини шакллантириб бориш, уларнинг ўзлари қизиққан спорт турлари билан мунтазам равишда шуғулланиб бориши ҳамда ижобий натижаларга эришиши учун зарур шарт-шароитларни яратиб бериш, филиалда таҳсил олаётган талабаларни оммавий спортга жалб қилиш мақсадида қизиқарли мусобақаларни ташкил этиб, уларни муносиб тақдирлаб бориш муҳим аҳамият касб этиши ҳақида тўхталиб, ғолибликни қўлга киритган жамоаларни самимий табриклади. Директор ўз нутқида шундай деди: «Биламизки, спорт соҳаси мамлакатни дунёга танитади. Хорижий давлатларда Ватанимиз байроғини баландларга кўтариб, нуфузли мусобақаларда ғолиб бўлган спортчи ёшларни кўрсам ҳавасим келади. Яратилган кенг имкониятлардан унумли фойдаланиб ижобий натижаларга эришаётган бундай ёшларга тасаннолар айтсанг арзийди. Яқин келажакда бизнинг талаба-ёшлар орасида ҳам спорт соҳасида юқори марраларни забт этишга қодир ёшлар бўлиши мумкин. Шу боис, улар орасида ушбу соҳани ривожлантириб боришга алоҳида эътибор қаратмоқдамиз». Тадбирнинг тақдирлаш қисмида эса 1-ўринни эгаллаб, мутлоқ ғолиб бўлган 2-босқич 200-гуруҳ талабаларидан ташкил топган «Тербенбес» жамоасига «Директор кубоги» тантанали равишда топширилди. Шунингдек, мусобақанинг якуний натижаларига қўра, 1-босқич 102-гуруҳ талабаларининг «Турон» жамоаси 2-ўринни эгаллаган бўлса, 2-босқич  208-гуруҳ талабаларидан таркиб топган  «Алпомиш» жамоаси 3-ўринни олишга муваффақ бўлди. Барча ғолиб жамоаларга директор томонидан диплом ва эсдалик совғалари топширилди. Талаба-ёшлар ушбу ташкил этилган мусобақадан жуда мамнун бўлишди.