Қорақалпоқ адабиётининг ёрқин намояндалари таваллудининг 93 йиллиги нишонланди

Самарқанд давлат ветеринария медицинаси, чорвачилик ва биотехнологиялар университети Нукус филиали мажлислар залида жорий йилнинг 6 май куни қорақалпоқ адабиётининг ёрқиннамояндалари Ибройим Юсупов ҳамда Тўлепберген Қаипбергенов таваллудининг 93 йиллиги муносабати билан адабий-бадиий кеча ўтказилди. Тадбирда Ахборот хизмати раҳбари З.Хожамуратова, ветеринария ва зооинженерия факультети декани А.Каниязов, «Табиий ва гуманитар фанлар» кафедраси катта ўқитувчиси И.Халмуратов, Н.Қурбанбаева  ҳамда  талаба-ёшлар иштирок этишди.  А.Каниязов кечани кириш сўзи билан очиб бериб, қўшалоқ туғилган кун муносабати билан барчани самимий табриклаб ўтди. Тадбир давомида И.Халмуратов, Н.Қурбанбаева ҳамда З.Хожамуратовалар сўзга чиқиб, севимли ёзувчи ва шоиримизнинг ибратли ҳаёт йўли ва бой ижодий фаолияти ҳақида тўхталди. Ҳар иккала ижодкор қорақалпоқ адабиётида ёрқин из қолдириб, хотирамизга ва қалбимизга муҳирланганлиги таъкидлаб ўтилди. —  Ҳар бир қорақалпоқ оиласининг, айниқса китобхонларнинг китоб жавонидан албатта Ибройим Юсупов ҳамда Тўлепберген Қаипбергеновнинг шеърий тўпламлари ва асарлари топилишига аниқ ишонч билдираман. Боиси, қорақалпоқ фарзандининг китоб мутолаасига муҳаббати мазкур ижодкорларнинг асарларидан бошланади  — дейди Ахборот хизмати раҳбари З.Хожамуратова. Шунингдек, тадбир давомида ёзувчи Т.Қаипбергеновнинг «Қорақалпоқ достони» трилогияси, «Қорақалпоқнома» роман-эссеси ва «Қорақалпоқ қизи» асарига алоҳида урғу бериб ўтилди. Шунингдек, И.Юсуповнинг шеърияти тематикаси ва йўналиши борасида маълумотлар бериб ўтилди ҳамда бадиий хусусиятлари  таҳлил қилинди. Ушбу кечанинг бадиий қисмида эса филиал талаба-ёшлари томонидан шоирнинг бир-биридан маъноли шеърлари маромига етказиб ижро этилди ҳамда ёзувчининг асарларидан таъсирли қилиб парча келтирилди. Талаба-ёшлар томонидан тайёрланган видеороликлар намойиш этилди. Қорақалпоқ адабиётининг ёрқиннамояндалари Ибройим Юсупов ҳамда Тўлепберген Қаипбергенов таваллудининг 93 йиллиги муносиб тарзда нишонланди.