Филиал талабалари II Республика «Китобхонлик ҳафталиги» да фаол иштирок этишди

Жорий йилнинг 22 апрель куни Самарқанд ветеринария медицинаси институти Нукус филиалининг талаба-ёшлари Қорақалпоғистон Республикаси Ахборот-кутубхона марказида “Китобсевар миллат” шиори остида бўлиб ўтган II Республика «Китобхонлик ҳафталиги»нинг ёпилиш ва тақдирлаш маросимида фаол иштирок этишди. Ушбу ташриф Ахборот-ресурс маркази бўлими бошлиғи Ж.Халмуратова ҳамда матбуот котиби З.Хожамуратовалар томонидан ташкиллаштирилди. Тадбирни Қорақалпоғистон Республикаси Ахборот-кутубхона маркази директори И.Шарапова кириш сўзи билан очиб бериб, ёшлар орасида китобхонлик маданиятини юксалтиришда мана шундай тадбирларнинг аҳамияти ҳақида тўхталди. Ж.Халмуратова ҳам сўзга чиқиб, «Китобхонлик ҳафталиги» юқори савияда ташкил этилганлигини таъкидлаб, ташкилотчиларни табриклаб ўтди. 

Тадбир давомида ушбу ҳафталик доирасида ўтказилган танловларда филиал талабаларининг фаол тарзда иштирок этганлиги алоҳида эътироф этилди. Маросимнинг  тақдирлаш қисмида эса II Республика «Китобхонлик ҳафталиги»да фаол қатнашганлиги учун Ж.Халмуратова ҳамда талаба-ёшлар ташаккуронма билан тақдирланишди. Тадбир давомида филиал талаба-ёшларидан таркиб топган «Қарекеӊше онлайн» жамоаси томонидан саҳнали кўринишлар ва куй-қўшиқларнинг ижро этилиши йиғилганларга бирдек манзур бўлди. Иқтидорли ва шўх-шодон йигит қизларимиз ўз чиқишлари билан барчага кўтаринки кайфият улашди. Китобхонликни тарғиб қилиш мақсадида ташкил этилган мана шундай тадбирларда иштирок этиш орқали талаба-ёшларнинг китоб мутолаасига бўлган қизиқиши ва меҳри янада ортиб боради. Маълумот учун, 4-9-апрель оралиғида филиалимизда ҳам «Китобхонлик ҳафталиги» юқори савияда ўтказилган эди.