"Адолатли сайлов-фаровон ҳаёт пойдевори" иншолар танловида филиал талабаси ғолиб бўлди

Ҳозирги кунда юртимизда 24 октябрь куни бўлиб ўтадиган Ўзбекистон Республикаси Президенти сайловига қизғин тайёргарлик ишлари олиб борилмоқда. Жумладан, сайлов муносабати билан жорий йил 11 октябрь куни Бердақ номидаги Қорақалпоқ давлат университетида «Талаба-ёшлар ва сайлов» шиори остида форум бўлиб ўтди. Форумни ташкиллаштиришдан кўзланган асосий мақсад талаба-ёшларни сайловда фаол иштирок этишга чорлаш, уларнинг фаол иштирокини таъминлаш ва овоз бериш тартиби бўйича билимларини янада мустаҳкамлашдан иборат. Тадбир доирасида юртимиздаги олий таълим муассасалари талабалари орасида “Мен сайловчиман” шиори остида "Заковат" интеллектуал ўйинлари, викториналар, иншолар танлови, “Келажагинг учун овоз бер!” шиори остида видеороликлар танлови ўтказилди. Самарқанд ветеринария медицинаси институти Нукус филиали талаба-ёшлари мазкур танловларда фаол тарзда қатнашдилар. Шуни алоҳида таъкидлаш жоизки, “Адолатли сайлов-фаровон ҳаёт пойдевори” мавзусида ўтказилган иншолар танловида филиалимизнинг 1-босқич талабаси И.Ваққосова фаҳрли биринчи ўринни эгаллаб, танлов ғолибаси бўлди. Иқтидорли талабамизнинг ёзган иншоси ҳайъат аъзолари томонидан муносиб баҳоланганидан жуда мамнун бўлдик. Шунингдек, ҚДУнинг талабаси С.Матёқубов 2-ўринни эгаллаган бўлса, Навоий давлат кончилик институти Нукус филиалининг талабаси Ш.Абдуллаеванинг ёзган иншоси 3-ўринга муносиб деб топилди. Ғолиблар диплом билан тақдирландилар. Тақдирлаш маросимидан сўнг концерт дастури форум  иштирокчилари эътиборига ҳавола этилди. Филиал талабаларнинг кайфияти аъло даражада эканлигини уларнинг мамнун юз ифодаларидан пайқаш қийин эмас. "Талаба-ёшлар ва сайлов" шиори остидаги форум кўтаринки кайфиятда бўлиб ўтди.

Филиал матбуот котиби