Наврўз айёмингиз муборак бўлсин азизлар!
Ассалому алайкум азиз юртдошлар, қадрли филиал жамоаси!
Катта самимият билан сизларни, сизлар орқали барча оила аъзоларингизни ва бутун республикамиз халқини Наврўз байрами билан қутлайман!
Мана, совуқ кунлар ортда қолиб, юртимизга баҳор таровати кириб келди. Бу фасл ажойиб байрамларга бойлиги билан ҳам ажралиб туради. Яқиндагина 8-март Халқаро хотин-қизлар байрамини юқори кайфият билан нишонлаган эдик. Энди эса муборак айёмимиз–Наврўз байрами арафасида турибмиз. Авваломбор, мана шундай қутлуғ кунларга барчамизни соғ-саломатликда етказганига минг шукурлар бўлсин! Қувонарлиси байрам шукуҳи юртимиз бўйлаб кезиб юрибди. Наврўз умумхалқ байрамида халқимиз яхши ниятлар билан, янги умидлар билан дилидаги энг эзгу тилакларини билдиради. Миллийлигимизни ва олий қадриятларимизни ўзида акс эттирган мазкур айём қалбимизга беғубор қувонч ҳиссини жойлайди. Наврўз шодиёнаси дошқозонларда қайнаётган сумалакнинг ёқимли хиди, арғимчоқда учаётган болаларнинг шодон кулгуси, байрам куйига рақсга тушаётган қизларнинг нозик ҳаракатларида мужассам. Халқимиз миллий байрамни нишонлаш учун тайёргарликни аллақачон бошлаб юборди. Шу ўринда барчамизга маълумки, сўнгги кунларда аҳоли ўртасида коронавирус инфекцияси билан касалланиш ҳолатлари бироз ортганлиги боис, байрам тадбирларида аҳолини кўп тўпламаслик ва ташриф буюрувчилар ниқобда бўлишлари ҳамда ижтимоий масофани сақлашлари устидан назоратни ўрнатиш, аҳоли гавжумлигининг олдини олиш мақсадида тадбирларни кичик ҳажмда маҳаллаларда ташкил этиш сингари чораларни кўриш белгиланди. Албатта, катта шодиёнамиз арафасида юртимизда касалланишлар сони ортганлиги дилимизни хира қилади. Аммо, ваҳимага асло ўрин йўқ. Фақат ҳар биримиз масъулиятни ҳис қилган ҳолда, ўзимиз ҳамда атрофимиздагилар саломатлигига бефарқ бўлмасдан, байрам тадбирларини республика махсус комиссиясининг кўрсатмалари асосида ташкиллаштириб, оддий ва муҳим карантин талабларига амал қилсак, Наврўз байрамини кўнгилсизликларсиз ҳамда юқори кайфиятда яқинларимиз билан биргаликда қарши оламиз. Бу муборак айёмни барчамиз бирдек қадрлаймиз, соғиниб интиқлик билан кутамиз ва мана шу қутлуғ сана келганида кўнгиллар нурафшон бўлади. Тинч ва осуда ҳаётимизни мана шундай байрамлар янада безатади.
Биламизки, Наврўз байрамининг тарихи асрларга тенг. Аждодларимиз ҳам мазкур айёмни эъзозлашган. Дилимиздаги энг соф ниятларни ўзида мужассам этган байрам арафасида сиз азизларга байрам табригини йўллаётганимдан жуда мамнунман. Фурсатдан фойдаланиб, яна бир марта бутун республикамиз халқини, филиал жамоасини ҳамда талаба-ёшларни Наврўз умумхалқ байрами билан қизғин ва самимий муборакбод этаман! Ҳаммангизга сиҳат саломатлик, оилангизга хотиржамлик, ватан равнақи йўлидаги эзгу ишларингиза эса катта зафарлар тилайман! Ҳар бирингизнинг хонадонингизда дошқозонда сумалак қайнаб, байрам дастурхонингиз тўкин-сочин бўлсин! Яхши кунларда соғ-саломатликда кўришиш барчамизга насиб этсин! Наврўз айёмингиз муборак бўлсин азизлар!
Ҳурмат билан,
Адилбай ЕСИМБЕТОВ,
Самарқанд ветеринария медицинаси институти
Нукус филиали директори
скачать dle 12.1
Telefon
E-mail
