Энди мен талабаман!
Жорий йилда мен энг олий мақсадларимдан бирига эришдим. Тест синовидан муваффақиятли ўтдим ва Самарқанд ветеринария медицинаси институти Нукус филиалига грант асосида талабаликка қабул қилиндим. Энди мен талабаман! Қалбимда кечаётган фахр туйғусини ва кучли ҳаёжонимни сўз билан ифодалаш қийин. Кириш имтиҳонларига тайёргарлик чоғида зиммамдаги юксак масъулиятни чуқур ҳис қилган ҳолда бор салоҳиятимни ишга солиб билимимни мустаҳкамлашга ҳаракат қилдим. Шукрлар бўлсинки, ниятим ижобат бўлди. Албатта бунда давлатимизда тест синовлари шаффоф тарзда ўтиши таъминланганлиги алоҳида эътирофга лойиқ. Айниқса юртимиздаги пандемия даврида абитуриентлар учун ҳар томонлама қулайлик яратиш мақсадида ҳужжатларни онлайн топшириш йўлга қўйилди. Шунингдек, кириш имтиҳонларида карантин қоидаларини инобатга олган ҳолда абитуриент ёшлар учун барча шарт-шароитлар яратилди. Ота-онам ва устозларимнинг менга билдирган ишончини оқлаб, биринчилар сафида талабалик бахтига муяссар бўлганлигимдан жуда мамнун бўлдим. Менга билим берган устозларимга чуқур миннатдорчилигимни изҳор қиламан. Энг юқори балл тўплаганим учун улар ҳам мен билан ғурурланишларини айтишди.
Ҳаётимда янги бир саҳифа очилди. Қалбимда янада катта орзу ва мақсадлар уйғонди. Эндиликда, билимларни чуқур ўзлаштириб, филиалдаги фаол талабалар сафида бўлишга интиламан. Ветеринария соҳаси бўйича етук мутахассис бўлиш учун бор куч-ғайратимни ишга соламан. Юртимизда биз ёшларнинг сифатли ва замонавий таълим олишимиз учун яратилган кенг имкониятларнинг гувоҳи бўлиб туриб, билим олишга бўлган иштиёқимиз янада ортади. Танишув дарслари жараёнида Самарқанд ветеринария медицинаси институти Нукус филиалидаги шарт-шароитлар билан яқиндан танишиб тўғриси жуда қувондим. Профессор-ўқитувчилар биз талабаларни чуқур бир мамнуният билан кутиб олишди. Уларнинг самимияти, бизга кўрсатган эътибори қалбимизда ҳурмат ва меҳр ҳисини оширди. Талабалик давримнинг беғубор онларини бекорга сарфламасликка астойидил ҳаракат қиламан. Мен сингари талабалик бахтига муяссар бўлган тенгдошларимни самимий табриклаган ҳолда ўқишларида муваффақиятлар тилайман!
Мырзамурат Бийимбетов
СамВМИ Нукус филиали талабаси
скачать dle 12.1
Telefon
E-mail
