1-босқич талабалар учун танишув дарслари бошланади
Талабаликка тавсия этилган абитуриентлар—1-курс талабаларига 12-октябрдан бошланадиган олий таълим муассасаларидаги танишув дарслари ҳақида қўшимча маълумотлар.
12-октябрь, душанба кунидан бошлаб, талабаликка тавсия этилган абитуриентлар — 1-босқич талабалар учун олий таълим муассасаларида 3 кундан икки ҳафтагача танишув дарслари ташкил этилмоқда.
Анъанавий таълим шаклида бошланаётган ушбу дарс жараёнлари карантин қоидаларига тўлиқ амал қилган ҳолда, аудиторияларнинг 50 фоиздан кўп қисмига талабаларни киритмасдан олиб борилади. Дарслар кунига 2 парадан ортиқ бўлмайди. Паралар орасида талабаларга 10 дақиқалик танафус берилади.
Талабалар турар жойларига талабалар жойлаштирилмайди ва Тошкент шаҳридаги олий таълим муассасасига ўқишга кирган вилоятдаги абитуриентлар учун ўзининг ҳудудидаги олий таълим муассасасида танишув дарслари ташкил этилади ва Тошкент шаҳридаги олий таълим муассасаларидан профессор-ўқитувчилар боради.
Танишув дарслари таълим шаклидан (кундузги, сиртқи ва кечки) қатъий назар талабаликка тавсия этилган барча абитуриентлар—1-босқич талабалар учун ташкил этилади.
Танишув дарсларида 1-босқич талабалар дарс жадвали, дарс берадиган ўқитувчи ва профессорлар билан таништирилади. Керакли дарсликлар ва фойдаланиладиган адабиётлар ҳақида маълумот берилади.
12-октябрда бошланадиган танишув дарслари орқали 1-босқич талабаларига масофавий (онлайн) таълим олиш кўникмаси шакллантирилади. Шунингдек, тўлов-контрактни амалга ошириш учун шартнома тақдим этилади ва шартлари тушунтирилади.
Танишув дарслари якунлангач, 1-босқич талабалар ҳам бошқа курс талабалари сингари ўқишни масофавий (онлайн) шаклда давом эттирадилар.
скачать dle 12.1
Telefon
E-mail
