СамВМИ Нукус филиали директорининг байрам табриги
Азиз юртдошлар! Мана қалбимизни ғурур-ифтихорга тўлдирадиган айёмимиз ҳам эшик қоқиб турибди. Авваламбор, мустақиллигимизнинг 29 йиллик тантанасига барчамизни яна бир бор соғ-саломатликда етказганига беҳисоб шукроналар бўлсин! Дарҳақиқат, мазкур байрам ҳаммамиз интиқиб, орзиқиб кутадиган энг улуғ ва энг катта шодиёнамиз ҳисобланади. Шу қисқа фурсатлар ичида давлатимизда амалга оширилган кенг кўламли ислоҳатлар ҳамда ўсиш ва юксалишларни гувоҳи бўлиб келмоқдамиз. Мустақил Ўзбекистон юксалиш йўлидан бормоқда. Биргина таълим соҳасини олиб қарайдиган бўлсак, сўнги йилларда амалга оширилаётган ислоҳотлар талаба ёшлар учун кенг имконият эшикларини очиб бермоқда. Келажагимиз эгалари бўлган ёшлар таълимига бўлган бундай юксак эътибор албатта ўзининг самарали натижасини бериши аниқ. Президент Фармони билан Ўзбекистон Республикаси олий таълим тизимини 2030 йилгача ривожлантириш концепцияси тасдиқланганлиги ва унда амалга оширилиши зарур бўлган қатор устивор вазифалар белгиланиши йўқорида таъкидлаб ўтилган сўзларимизнинг исботи бўла олади. Юртимиздаги мураккаб даврда пандемия шароитида ҳам олий ўқув юртларида таълим бериш жараёни узилиб қолмади. Талабаларни онлайн ўқитиш йўлга қўйилди. Бу эса ўз навбатида юртимиздаги барча олий таълим муассасаларига яхши бир тажриба бўлди. Эндиликда, масофавий таълим бериш бўйича яхшигина кўникмага эга бўлдик. Сентябрь ойидан бошлаб ўқиш онлайн бошланиши белгиланди. Бунда таълим сифатидан ҳавотир олишга ўрин йўқ деб ўйлайман. Сабаби, жонкуяр профессор-ўқитувчиларимиз қандай шаклда бўлишидан қаътий назар яхши билим беришга ва замон билан тенг қадам босишга интилишади. Муборак рамазон ҳайити айёмини ҳам мана шундай мураккаб вазиятда ёруғ юз билан нишонлаб олдик. Муҳтарам Президентимиз Шавкат Мирзиёев раислигида ўтказилган видеоселектор йиғилишида пандемия билан боғлиқ вазият бу йил жойларда катта йиғин ва сайиллар ўтказишни чеклаш талабини тақоза этаётганлигини, шу сабабли ушбу улуғ санани кўпроқ оила даврасида нишонлашни ташкил этиш масалалари таъкилдаб ўтилди. Албатта, биринчи навбатда ўзингиз ва ўзгаларнинг саломатлиги хавфсизлигини таъминлаш ҳозирги кунда муҳим масала саналади. Мана шу улуғ байрамга яқинларимиз билан биргаликда эсон-омон етказганлигининг ўзи бизга ином этилган катта туҳфа деб ўйлайман. Шундай оғир ва синовли кунлардан чиройли сабр билан ўтиб оламиз. Фақат дилингизга яхши ният солиб, чин кўнгилдан илтижолар қилинг! Фурсатдан фойдаланиб, барча юртдошларимизни, филиалимиз жамоасини ва азиз талабаларни улуғ тантанамиз Ўзбекистон Республикаси Мустақиллигининг 29 йиллиги байрами муносабати билан самимий муборакбод этаман! Юртимиз тинчлигига кўз тегмасин! Осмонимиз ҳар доим мусаффо бўлсин! Ҳар биримизнинг қалбимизда мудом тинчлик мадҳияси янграб турсин. Кўчаларимиз баҳтиёр одамлар билан тўлиб-тошиб, ҳар бир онимиз шоду-ҳуррамликка бой бўлсин! Илойим, мўътабар отахон ва онахонларимизнинг дуолари ижобот бўлиб, тез орада юртимиздаги мавжуд мураккаб вазият бутунлай бартараф бўлсин! Ҳаммангизга сиҳат саломатлик тилаб қоламан! Яхши кунларда дийдор кўришиш насиб этсин! Яна бир бор байрам муборак!
Ҳурмат билан,
Адилбай Есимбетов,
Самарқанд ветеринария медицинаси институти
Нукус филиали директори
скачать dle 12.1
Telefon
E-mail
