СамВМИ Нукус филиали директорининг абитуриентларга мурожаати!
Ҳурматли абитуриент!
Биринчи навбатда, ветеринария ва чорвачилик соҳасига меҳр қўйиб, бу йўналишда етук мутахассис бўлишни ният қилганингиз учун сизга ўз ташаккурларимни изҳор этаман. Шу мақсадда Самарқанд ветеринария медицинаси институтининг Нукус филиалига хужжат топширганингиз, қувонарли ҳол, албатта.
Бизнинг асосий мақсадимиз – соҳада замонавий билимларга ва яхши амалий кўникмаларга эга бўлган етук кадрларни тайёрлашдан иборат. Биз асосий эътиборни сифатли таълим ва амалиётга қаратамиз. Ўқиш жараёнлари ҳам шунга йўналтирилган. Келажакда мана шу соҳа бўйича етук мутахассис бўлишни ният қилган шижоатли ёшларни ўз мақсадларига эришиш йўлидаги барча зарур шарт-шароитларни яратишда бор имконият ва салоҳиятимизни ишга соламиз.
2020-2021 ўқув йилида Самарқанд ветеринария медицинаси институти Нукус филиали кундузги таълим шакллари 5 та бакалавриат таълим йўналишлари бўйича жами 5153 нафар абитуриентлар тизимдан ўтказилган, шундан филиални биринчи танлаган абитуриентлар жами 1140 нафар бўлди. Бир ўринга 13,7 нафар абитуриент тўғри келди. Филиалимиз жами 375 нафар талабани қабул қилади.
Юртимиздаги мавжуд эпидемиологик вазият туфайли олий таълим муассасаларига кириш имтихонларининг муддатлари ортга сурилгани барчамизга маълум. Бунда, биринчи навбатда келажагимиз умидлари бўлган сиз азиз ёшларнинг саломатлигингиз ва хавфсизлигингизни таъминлаш кўзда тутилди. Абитуриентлар ва кузатувчиларнинг тест синовлари жараёнидаги хавфсизлиги ўта муҳим ҳисобланади. Шу боис, жорий йилги кириш имтихонлари 2020 йил сентябрь ойининг 2-санасидан бошлаб ўтказилиши белгиланди. Менимча, ўтган вақт сизларга билимларингизни янада мустаҳкамлаб олишда янаям фойдали бўлди десам, муболаға бўлмайди.
Ҳурматли абитуриент, сиз паспортингиз ва ДТМ рухсатномангиз билан рухсатномада кўрсатилган манзилга ўз вақтида етиб боришингиз зарур. ДТМ рухсатномаларини онлайн юклаб олиш эса 22 августдан бошланди.
Муҳтарам абитуриент!
Имтихон сизнинг билимларингизни синовдан ўтказадиган муҳим жараёнлардан биридир. Ўз билимингизга ишонинг ва, албатта карантин қоидаларига риоя этгган ҳолда тест синовлари ўтказилиши белгиланган манзилга ўз вақтида етиб келишингизни сўраймиз.
Кириш имтихонларининг ўтиш муддати, жадвали ва натижалари ҳамда ўзингизни қизиқтирган барча саволлар бўйича http://samvminf.uz/ сайти, @SamVmiNukuSFiliaL расмий телеграм канали орқали ҳамда samvminf@edu.uz электрон манзилига ёки 861 224-73-03; 861 224-71-03: 90-650-24-12; 90-387-07-70; рақамли телефонларга мурожаат этишингиз мумкин.
Тест синовларини ўтказишда адолат ва шаффофлик таъминланади. Шундай экан, ўзингизнинг бор салоҳиятингизни ишга солиб катта мақсадлар томон дадил қадам ташланг! Барчангизга кириш имтиҳонларидан муваффақият ёр бўлишини тилаб қоламан! Чуқур билим ва кучли ирода билан сиз олий мақсадга, албатта эришасиз!
Юксаклик томон интилинг!
Ҳурмат билан,
Адилбай Есимбетов,
Самарқанд ветеринария медицинаси институти
Нукус филиали директори
скачать dle 12.1
Telefon
E-mail
