SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Student-qızlar arasında doslıq voleybol jarısları shólkemlestirildi

Salamat turmıs tárizin úgit-násiyatlaw, student-jaslar, atap aytqanda, student-qızlar arasında sportqa qızıǵıwshılıqtı arttırıw, olar arasında doslıq múnásibetlerin jáne de bekkemlew maqsetinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı hám Muhammed al-Xorezmiy atındaǵı Tashkent málimleme texnologiyaları universiteti Nókis filialı arasında doslıq voleybol jarısı ótkerildi. Shólkemlestirilgen bul jarısta hár eki joqarı bilimlendiriw mákemesiniń sportqa qızıǵıwshı student-qızları belsene qatnastı. Jarıs dawamında voleybolshı qızlar ózleriniń fizikalıq tayarlıǵın, shaqqanlıǵın hám komandalıq hárekettegi úylesimliligin kórsete aldı.

Oyınlar doslıq ruwxında, sporttıń barlıq qaǵıydalarına ámel etilgen halda, joqarı keypiyatta ótti. Jarısqa Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń student-qızları jaslar menen islesiw boyınsha dekan orınbasarı E.Seytmuratov, "Ekonomika hám gumanitar pánler" kafedrası oqıtıwshısı Q.Urazbaev hám tyutor J.Mambetniyazovlar menen birgelikte qatnastı.

Bul sport ilajı tek ǵana salamat báseki ortalıǵın jaratıp qoymastan, al qatnasıwshılarǵa óz-ara tájiriybe almasıw, fizikalıq belsendilikti arttırıw, sport arqalı salamat ortalıqtı qáliplestiriwde úlken áhmiyetke iye boldı. Ásirese, bunday sport ushırasıwları arqalı jaslar arasında salamat báseki, unamlı keypiyat, awızbirshilik hám doslıq sıyaqlı unamlı pazıyletler bekkemlenedi. Ilaj juwmaǵında eki komanda aǵzaları shólkemlestiriwshilerge hám bir-birine óz minnetdarshılıǵın bildirip, bunday jarıslardıń turaqlı shólkemlestiriliwi tárepdarı ekenligin atap ótti.