SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Biz korrupciyaǵa qarsımız" temasında dógerek sáwbeti shólkemlestirildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında jaslar arasında huqıqıy sananı hám mádeniyattı arttırıw, korrupciyaǵa qarsı gúresiw baǵdarında olardıń belsendiligin kúsheytiw maqsetinde "Biz korrupciyaǵa qarsımız" atamasında dógerek sáwbeti bolıp ótti. Onda Ózbekstan "Adolat" social-demokratiyalıq partiyasınıń Qaraqalpaqstan Respublikası Keńesi baslıǵınıń orınbasarı Sh.Toreshova, partiyanıń Nókis qalalıq Keńesiniń baslıǵı B.Masharipova, Qaraqalpaqstan Respublikası Ádillik ministrligi aymaqlıq basqarmasınıń wákili N.Berdiniyazova, filialdıń profilaktika inspektorı, kapitan Q.Qayıpnazarov, sonday-aq, korrupciyaǵa qarsı gúresiw "Komplaens qadaǵalaw" sistemasın basqarıw bóliminiń bas qánigesi T.Smaylov qatnastı.

Ilajda filialda oqıp atırǵan student-jaslar da belsene qatnastı. Dógerek sáwbetin filialdıń Jaslar máseleleri hám ruwxıy-aǵartıwshılıq isleri boyınsha direktor orınbasarı X.Abdijaliyev kiris sóz benen ashıp, korrupciyanıń jámiyetlik rawajlanıwǵa unamsız tásiri, jas áwladtıń bul illetke qarsı bolıwı zárúrligi haqqında aytıp ótti.

Ilaj dawamında qánigeler tárepinen korrupciyanıń huqıqıy aqıbetleri, oǵan qarsı gúresiwde puqaralıq poziciyasınıń áhmiyeti, sonday-aq, ámeldegi nızamshılıq sheńberinde kórilip atırǵan ilajlar haqqında hár tárepleme maǵlıwmatlar berildi. Studentler ózlerin qızıqtırǵan sorawlar menen múrájat etip, tema boyınsha óz pikir-usınısların bildirdi. Dógerek sáwbeti ashıqtan-ashıq sóylesiw hám soraw-juwaplar ruwxında ótip, qatnasıwshılarda korrupciyaǵa qarsı gúresiw baǵdarında jáne de tereń túsinik payda etiwge xızmet etti.