SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Sharwashılıq hám jaylaw xojalıǵınıń ilimiy tiykarları hám rawajlanıw perspektivaları

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń "Zooinjeneriya" kafedrası tárepinen shólkemlestirilgen "Sharwashılıq hám jaylaw xojalıǵın rawajlandırıw: mashqalalar hám sheshimler" atamasındaǵı Respublikalıq ilimiy-ámeliy konferenciyası sharwashılıq tarawında ilim hám ámeliyat integraciyasın kúsheytiwge baǵıshlandı. Onda professorlar, jas ilimpazlar hám student-jaslar qatnasıp, tarawdıń áhmiyetli máselelerin dodaladı.
Konferenciyanı ilimiy isler hám innovaciyalar boyınsha direktor orınbasarı Sh.Avezimbetov ashıp, onıń sharwashılıq tarawındaǵı ilimiy izertlewlerdi ámeliyatqa engiziwde áhmiyetli rol atqaratuǵının atap ótti. Ilajda tómendegi tiykarǵı baǵdarlar dodalandı: Sharwashılıq tarmaqların jáne de rawajlandırıwda ilimiy-izertlew jumısların engiziw nátiyjeliligi.
Jaylawlardan aqılǵa uǵras paydalanıw hám sharwashılıqtıń ot-jem bazasın bekkemlew. Veterinariya izertlewleriniń sharwashılıqtıń rawajlanıwına tásiri.

Bul ánjumanda Tashkent mámleketlik agrar universitetiniń professorı M.Dosmuxamedova da qatnasıp, konferenciyanıń ilimiy-ámeliy áhmiyetine joqarı baha berdi. — Men bul konferenciyada "Import etilgen qaramallardıń ónimdarlıǵın saqlaw hám tárbiyalawdıń ózine tán tárepleri" atamasındaǵı bayanatım menen qatnasıp atırman. Ilaj dawamında professorlar, ilimpazlar hám jas izertlewshiler tárepinen usınıs etilgen ilimiy izlenisler menen tanısıw imkaniyatı jaratıldı. Ásirese, jaylawlardan nátiyjeli paydalanıw, sharwashılıqta ot-jem bazasın bekkemlew hám veterinariyalıq izertlewlerdiń sharwashılıqtıń rawajlanıwına tásiri sıyaqlı áhmiyetli máseleler boyınsha alǵa qoyılǵan ilimiy sheshimler oǵada qızıqlı hám ámeliy áhmiyetke iye boldı. Bul konferenciya tek ǵana taraw qánigelerin birlestiriw emes, al jańa ilimiy birge islesiwler hám innovaciyalıq qatnaslardı engiziw ushın da áhmiyetli platforma bolıp xızmet etpekte. Bunday ilimiy ánjumanlar sharwashılıq tarmaǵınıń jáne de rawajlanıwına, zamanagóy ilim jetiskenlikleriniń ámeliyatqa engiziliwine hám tarmaq aldında turǵan áhmiyetli mashqalalarǵa nátiyjeli sheshim tabıwǵa úlken úles qosatuǵınına isenemen, — deydi M.Dosmuxamedova.

Bul ilimiy-ámeliy konferenciya sharwashılıq tarawı aldında turǵan áhmiyetli mashqalalardı tallaw, olardıń sheshimlerin ilimiy tiykarda islep shıǵıw hám ámeliyatqa engiziw baǵdarında nátiyjeli dodalawlar maydanı boldı. Ilaj sheńberinde aldıńǵı tájiriybeler almasıldı, innovaciyalıq kózqaraslar usınıs etildi hám tarawdıń keleshektegi rawajlanıwı ushın ilimiy tiykarlanǵan strategiyalar belgilendi. Konferenciyanıń nátiyjeleri sharwashılıq hám jaylaw xojalıǵı tarawın bunnan bılay da rawajlandırıwǵa, nátiyjeli basqarıw sistemaların qáliplestiriwge hám ilim jetiskenliklerin óndiriske engiziwge xızmet etedi.
Álbette, bunday ilimiy ánjumanlar tarawǵa baylanıslı jańa ilimiy izleniwler ushın bekkem tiykar jaratıp, ilim hám ámeliyat integraciyasın kúsheytiwge xızmet etedi.