SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Direktor hám jaslar ushırasıwı: Keleshekke isenimli qádem

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında direktor hám jaslar ushırasıwı bolıp ótti. Ilaj dawamında filial direktorı, professor A.Esimbetov pitkeriwshi kurs studentleri menen ashıqtan-ashıq sáwbet ótkerip, olardıń keleshektegi rejeleri, ilimiy izlenisleri hám jámiyettiń rawajlanıwına qosatuǵın úlesleri haqqında sáwbetlesti.
Filial direktorı A.Esimbetov jaslarǵa motivaciya berip, olarǵa tómendegi pikirlerdi bildirdi: "Búgingi kúnde ilim hám texnologiya joqarı sheklerge shıqpaqta. Siz - biziń keleshegimiz, ilimniń rawajlanıwına túrtki beretuǵın dóretiwshi áwladsız. Óz aldıńızǵa úlken maqsetler qoyıń, qıyınshılıqlardan qorıqpań hám hár bir imkaniyattan únemli paydalanıń. Haqıyqıy jetiskenlik tek ǵana mashaqatlı miynet hám isenim menen keledi. Eger siz ózińizge isenseńiz hám alǵa qaray isenimli qádem taslasańız, hesh qanday tosqınlıq sizdi irke almaydı. Ilimge qushtar bolıń, úyreniwden hesh qashan sharshamań!"
Ilaj dawamında studentlerdiń pikirleri tıńlanıp, olardıń keleshektegi rejelerine baylanıslı bahalı usınıslar berildi. Studentler de ózleriniń arzıw-niyetleri hám keleshektegi rejeleri haqqında aytıp, ilimiy jumıstı jáne de rawajlandırıwǵa tayar ekenligin bildirdi.

Ushırasıw jıllı hám qızǵın ruwxta ótti. Jaslar bunday sóylesiw olardıń ilimge bolǵan qızıǵıwshılıǵın jáne de arttırǵanın hám motivaciya bergenin atap ótti. Ilaj sońında A.Esimbetov: "Keleshek óz qolıńızda, barqulla alǵa umtılıń hám tabıs sizlerdiń ıqtıyarıńızda boladı!" - dep studentlerdi ilhamlandırdı. Bul ushırasıw studentlerge jańa ideyalar, motivaciya hám isenim baǵıshlap, olardıń umtılısların jáne de bekkemledi.