SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Qoyanshılıq" tarawın rawajlandırıw maqsetinde arnawlı seminar ótkerildi

Taqıyatas rayonında jaslardıń bántligin támiyinlew hám olardıń ekonomikalıq belsendiligin arttırıw maqsetinde "Qoyanshılıq" tarawı boyınsha arnawlı seminar shólkemlestirildi. Ilajda, tarawdıń rawajlanıwına úles qosıw ushın tájiriybeli qánigeler hám Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı "Zooinjeneriya" kafedrasınıń professor-oqıtıwshıları qatnasıp, qoyan ósiriwdiń sırları, góshtiń paydası hám biznes reje dúziw boyınsha bayanatlar oqıdı. Seminarda qatnasıwshılarǵa qoyan baǵıwdıń nátiyjeli usılları, onıń gósh ónimi hám onı kommerciyalastırıwda qanday paydalı imkaniyatlar jaratıw múmkin ekenligi haqqında keń kólemli prezentaciyalar berildi. Sonday-aq, qoyanshılıqtı kishi biznes sıpatında rawajlandırıw ushın qanday biznes reje dúziw kerekligi haqqında da áhmiyetli másláhátler berildi. Jaslardı jumıs penen támiyinlew hám olardı qoyanshılıq tarawına tartıw maqsetinde, aymaqtaǵı jumıssız 30 jasqa subsidiya tiykarında 330 bas násilli qoyan tapsırıldı. Hár bir qatnasıwshıǵa tek ǵana 11 bas qoyan berilip qoymastan, olarǵa arnawlı kletkalar da usınıldı. Bunnan tısqarı, qoyanlardıń jaqsı ósiwi ushın 1 aylıq azıqlıq ónimleri menen de támiyinlendi.
—Seminardan alǵan tásirlerim sonda, qoyan ósiriwshilik tarawınıń jaslar arasında rawajlanıwı hám bántlikti támiyinlewde áhmiyeti úlken. Ilajda qoyan baǵıwdıń nátiyjeli usılları hám onıń ekonomikalıq paydaları haqqında alınǵan bilimler, negizinde kishi biznesti baslaw ushın imkaniyat jaratıw menen birge, ekologiyalıq jaqtan da paydalı, —deydi kafedra baslıǵı X.Mamatov. Sonday-aq, seminar dawamında jaslar ózlerin ekonomikalıq jaqtan bekkemlew ushın jaqsı imkaniyatlarǵa ie ekenligin ańlap jetti. Bunday seminarlar jaslardıń intakerligin arttıradı hám olarǵa jańa baǵdarlar boyınsha bilim alıwǵa járdem beredi. Bul ilaj jaslar arasında qoyan ósiriw tarawına bolǵan qızıǵıwshılıqtı arttırıw, olardı óz biznesin baslawǵa ilhamlandırıw, sonday-aq, aymaqtaǵı ekonomikalıq jumıstı rawajlandırıwǵa úlken túrtki boldı.

Jaslardıń ózin-ózi bánt etiwi, sonday-aq, rayon ekonomikasına payda keltiretuǵın kishi biznes joybarların ámelge asırıwǵa qaratılǵan bul baslamanı dawam ettiriwde áhmiyetli orın ieleydi.