SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Deputat hám jaslar" temasında ushırasıw ótkerildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında Ózbekstan Xalıq demokratiyalıq partiyası Qaraqalpaqstan Respublikası Keńesi tárepinen "Deputat hám jaslar" atamasında áhmiyetli ushırasıw ótkerildi. Ilajda Ózbekstan XDP Qaraqalpaqstan Respublikası Keńesi baslıǵınıń orınbasarı M.Esengeldiyev, Xalıq deputatları Shımbay rayonlıq Keńesiniń deputatı X.Abdijaliev, Ózbekstan Xalıq demokratiyalıq partiyası Qaraqalpaqstan Respublikası Keńesiniń bólim baslıǵı G.Dalibaeva hám filialdıń belsendi student-jasları qatnastı.

Ushırasıwdıń tiykarǵı maqseti jaslardı siyasiy processlerge tartıw hám olardıń jámiyettegi ornı, sociallıq belsendiligin arttırıwdan ibarat edi. Deputat X.Abdijaliev shıǵıp sóylegen sózinde jaslardıń jámiyette óz ornın tabıwı hám hár bir insannıń elimizdiń rawajlanıwına qosqan úlesi áhmiyetli ekenligin atap ótti. Sonday-aq, Ózbekstan XDP Qaraqalpaqstan Respublikası Keńesi baslıǵınıń orınbasarı M.Esengeldiyev jaslardıń siyasiy jumısqa bolǵan qızıǵıwshılıǵın jáne de arttırıw, olardı keleshekte siyasatta tabısqa erisiw ushın tayarlaw zárúrligin atap ótti.

Ilaj dawamında, jaslardıń siyasiy belsendiligin qollap-quwatlaw maqsetinde, filialdıń belsendi student-jaslarına Ózbekstan Xalıq demokratiyalıq partiyası qatarına jańadan qabıl etilgenligin tastıyıqlawshı partiyanıń aǵzalıq gúwalıqları saltanatlı túrde tapsırıldı. Bul gúwalıqlar jaslardıń siyasiy processlerde qatnasıwı hám partiya jumısında belsene qatnasıw imkaniyatların jaratadı.
Sonday-aq, ushırasıwda jaslardıń bilimin, jámiyetlik hám siyasiy belsendiligin arttırıw, olar ushın jáne de keńirek imkaniyatlar jaratıw máseleleri dodalandı. Deputatlar hám partiya basshıları, jaslardı erkin pikirlewge, ózgerislerdi ámelge asırıwda belsene qatnasıwǵa shaqırdı. Ushırasıw jaslar ushın óz pikirlerin erkin bildiriw, ózgerisler procesinde qatnasıw ushın jańa imkaniyatlar jaratıwǵa shaqıratuǵın áhmiyetli ilaj boldı. Bunday ushırasıwlar, jaslardı siyasiy hám jámiyetlik processlerge tartıwda, olardı jámiyetlik jumıslarda belsene qatnasıwǵa xoshametlewde óziniń áhmiyetli rolin atqaradı.

Ushırasıw juwmaǵında jaslar ózleriniń jańa siyasiy bilimlerine iye bolıp, mámlekettiń rawajlanıwındaǵı orınları haqqında jáne de tereń túsinikke iye boldı.