SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ijara úylerindegi sharayatlardı jaqsılaw arqalı studentlerdiń bilimlendiriwdegi nátiyjeliligin arttırıw

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı basshıları ijara úylerde jasap atırǵan studentlerdiń jasaw sharayatların úyreniw maqsetinde olar menen sáwbetlesti. Filial direktorı A.Esimbetov ijara úylerine barıp, studentler menen sáwbetlesti, olardıń jasaw sharayatları, kúndelikli turmısı hám bilim alıwǵa bolǵan múnásibetin biliwge háreket etti.
— Eger student tınısh hám abadan ortalıqta jasasa, biz de qáterjam bolamız. Sonday-aq, ol ózin isenimli hám kúshli sezedi, bul bolsa oqıwǵa bolǵan itibarın hám qızıǵıwshılıǵın arttıradı. Bunday sharayatta student bilimge tolıq itibar qarata aladı, joqarı nátiyjelerge erisiwge umtıladı. Jasaw ortalıǵı studenttiń motivaciyasın qáliplestiriwde úlken áhmiyetke iye. Sonıń ushın biz studentlerge turaqlı, qolaylı hám nátiyjeli ortalıq jaratıwǵa ayrıqsha itibar qaratamız, bul olardıń akademiyalıq tabısların jáne de joqarı dárejege kóteriwge járdem beredi — deydi filial direktorı A.Esimbetov.
Házirgi waqıtta filialda 293 student 158 ijara úylerde jasaydı. Bul studentlerden 191 i ul balalar, 102 si bolsa qızlar bolıp tabıladı. Filial basshıları studentlerdiń bilim alıwı ushın hár tárepleme qolaylı hám zárúr sharayatlardı jaratıwǵa qaratılǵan jumıslardı dawam ettirmekte.
Bul ilajlar studentlerdiń ijara úylerindegi sharayatlardı jaqsılaw, olarǵa qolaylıq hám abadanlıq alıwǵa qaratılǵanı menen áhmiyetli. Studentlerdiń jaqsılanǵan sharayatlarda oqıwı, olardıń turaqlı rawajlanıwın hám bilim alıwǵa bolǵan motivaciyasın joqarı dárejege kóteriwge járdem beredi.