SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Ilim hám innovaciya:Jańa Ózbekstan Qarlıǵashları

Búgin, 28-fevral kúni Tashkent mámleketlik agrar universitetinde "Jańa Ózbekstanda Ilim-pán qarlıǵashları" atamasında studentlerdiń ekinshi respublikalıq ilimiy-ámeliy konferenciyası bolıp ótti. Bul konferenciyada Ózbekstan Respublikası Awıl xojalıǵı ministrligi sistemasındaǵı joqarı oqıw orınlarınıń studentleri qatnasıp, 200 den aslam maqala hám 100 ge shamalas startap joybarları menen konferenciyada belsene qatnastı.
Konferenciya sheńberinde shólkemlestirilgen hár qıylı tańlawlar, eń jaqsı maqalalar, joybarlar hám qollanbalarǵa baǵıshlanıp, qatnasıwshılar túrli nominaciyalar boyınsha estelik sawǵaları, diplom hám sertifikatlar menen sıylıqlandı. Bul ilimiy-ámeliy ilaj, tek ǵana studentler arasında innovaciyalıq ideyalardı alǵa qoyıw imkaniyatın jaratıp qoymastan, al ilim hám texnologiya tarawında jaslardıń belsene qatnasıwın támiyinlewge xızmet etti.
Anjumanda Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı studentleri de belsene qatnastı. Filialdıń qábiletli jasları, ózleriniń innovaciyalıq joybarları hám ilimiy maqalaları menen konferenciyada óz bilim hám kónlikpelerin kórsetti.
Quwanıshlı tárepi sonda, filial studentleri arasında 4-kurs studenti A.Saginova "Top 10 innovator" tańlawında jeńimpazlıqtı qolǵa kirgizdi hám diplom hám qımbat bahalı sawǵa menen sıylıqlandı. A.Saginova óziniń innovaciyalıq kózqarasları hám ideyaların dálillep, joqarı bahalandı.

4-kurs studenti A.Baltabaev "Eń jaqsı qollanba avtorı" nominaciyası boyınsha sertifikat penen sıylıqlandı. Talantlı studentimizdiń joybarı tán alındı.

Sonday-aq, 4-kurs student qızımız I.Tursınbaeva "Ideaton-Uzbekistan 2030" tańlawı sheńberinde "Bilimdan" nominaciyasında jeńimpaz bolıp, sertifikat penen sıylıqlandı. Onıń qábileti hám innovaciyalıq ideyaları joqarı bahalandı.
Jaslardıń umtılısları hám ilim tarawındaǵı jetiskenlikleri, olardıń keleshegi ushın bekkem tiykar bolatuǵını sózsiz. filialdıń studentleri, óz bilim hám tájiriybelerin arttırıwǵa umtılıp, tek ǵana ózi bilim alıp atırǵan joqarı oqıw ornınıń emes, al pútkil respublikanıń ilimiy-texnikalıq rawajlanıwına úles qosıwǵa háreket etpekte.
Studentlerimizdiń tabısları, tek ǵana olardıń jeke jetiskenlikleri emes, al elimizdegi bilimlendiriw hám ilim tarawınıń joqarı dárejege kóteriliwi ushın úlken qádem bolıp esaplanadı. Olardı shın júrekten qutlıqlaymız hám keleshektegi ilimiy jumıslarında jáne de joqarı sheklerdi iyelewin tileymiz!