SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial jámááti "Júweri gúrtik kúni" bayramında qatnastı

2025-jıl 25-fevral kúni "Qaraqalpaq awılı" etno-turistlik orayında "Júweri gúrtik kúni" bayramı keńnen belgilendi. Bul sáne sońǵı jılları dástúriy túrde "Júweri gúrtik kúni" sıpatında ótkeriledi. Bayramǵa Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń basshıları hám xızmetkerleri qatnastı. Sonday-aq, búgin filialǵa Belarus Respublikasınan kelgen miymanlar da milliyligimizdiń bay miyrası menen jaqınnan tanısıw maqsetinde ilájǵa mirát etildi.

Iláj sheńberinde qaraqalpaq xalqınıń bay mádeniyatı hám milliy qádiriyatları kórsetilgen bir qatar ilájlar shólkemlestirildi. Qara úyde milliy taǵamlardan dasturxan jayılıp, jası úlken nuranıylar menen mazmunlı sáwbetler ótkerildi. Bul sóylesiwlerde xalıqtıń tariyxıy úrp-ádetleri, mádeniyatı hám turmıs tárizine baylanıslı máseleler dodalandı. Sonday-aq, bayramda aspazlar tańlawı ótkerildi.

Onda qatnasıwshılar milliy taǵamlardı tayarlaw boyınsha sheberliklerin kórsetti. Iláj dawamında qaraqalpaq milliy folklor atqarıwshılarınıń koncert baǵdarlaması da shólkemlestirildi, bul bolsa tamashagóyler ushın ózine tán mádeniy baǵdarlama boldı. Milliy sport oyınları da bayramda áhmiyetli orın iyelep, qatnasıwshılarǵa túrli sport jarıslarında óz sheberliklerin kórsetiw imkaniyatın berdi. Ónermentler kórgizbesi de shólkemlestirilip, dástúriy ónerler kórgizbesi bolıp ótti. Bayram mádeniy ilájlar menen dawam etti hám qatnasıwshılarǵa turmıs penen ruwxıy miyrastı qádirlewde áhmiyetli bir imkaniyat berdi. Iláj sońında filial xızmetkerleri mádeniy dem alıp, milliy úrp-ádetlerimizden ilhamlanǵan halda qaytıp keldi.