SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Juwmaqlawshı qadaǵalawlar hápteligi processlerin ashıq-aydın alıp barılǵanı haqqında ashıq pikirlesiw ótkerildi

Samarqand mámleketlik veterinariya medicinası, sharwashılıq hám biotexnologiyalar universitetiniń Nókis filialı 2025-jıl 17-fevral kúni juwmaqlawshı qadaǵalawlar hápteliginde ashıq-aydınlıqtı támiyinlew maqsetinde ashıq sóylesiw shólkemlestirdi. Bul ilájdı filialdıń oqıw isleri boyınsha direktor orınbasarı Q.Atanazarov ashıp berdi.

Ashıqtan-ashıq sóylesiwde fakultet dekanı hám kafedra baslıqları, professor-oqıtıwshılar qatnasıp, juwmaqlawshı qadaǵalaw processleriniń qanday ámelge asırılǵanı, ashıq-aydınlıq hám ádil bahalawdı támiyinlew ushın qanday ilájlar kórilgenin dodaladı. Filialdıń pedagogikalıq jámááti, studentler ushın ashıq-aydın qadaǵalaw sistemasınıń áhmiyetin, bul tek ǵana oqıw processin nátiyjeli shólkemlestiriw emes, al studentlerdi jáne de rawajlandırıwǵa xızmet etetuǵının atap ótti.

Ashıq sóylesiw dawamında fakultet dekanları hám kafedra baslıqları óz pikirlerin bildirdi, juwmaqlawshı qadaǵalawlardıń qanday ótkeriliwi, qanday jańa innovaciyalıq metodlar engiziliwi haqqında maǵlıwmat berildi. Sonday-aq, oqıtıwshılarǵa studentlerdiń jumısların bahalawda jáne de obektiv hám ádil qatnas jasawdı támiyinlew ushın anıq kórsetpeler berildi. Maqset - hár bir studentke teńdey imkaniyatlar jaratıw, sonıń menen birge barlıq processlerdi ashıq-aydın hám izbe-iz ótkeriw bolıp tabıladı.

Ashıqtan-ashıq sóylesiwde, filial basshıları hám pedagogikalıq jámáát keleshekte bilimlendiriw processlerine jańa texnologiyalardı keńirek engiziwge qarar etti. Bul, óz gezeginde, bilimlendiriwdiń sapasın jáne de arttırıw, studentler ushın jaqsı oqıw sharayatların jaratıw hám joqarı oqıw ornınıń abırayın jáne de bekkemlewge xızmet etedi. Jańa rejelerge bola, studentler hám oqıtıwshılar arasındaǵı birge islesiwdi bekkemlew, imtixanlar hám basqa da qadaǵalaw processlerinde jańa metodlardı islep shıǵıw hám ámeliyatqa engiziw rejelestirilgen. Ótkerilgen ashıqtan-ashıq sóylesiw juwmaqlawshı qadaǵalawlar hápteliginiń ashıq-aydın hám ádil ótiwin támiyinlew baǵdarındaǵı áhmiyetli qádemlerden biri bolıp esaplanadı.

Ilájda qatnasqan barlıq qánigeler óz pikirlerin bildirip, bunday ilájlardıń studentler hám oqıtıwshılar arasındaǵı isenimdi arttırıwǵa xızmet etetuǵının atap ótti. Keleshekte de bilimlendiriwdiń sapasın arttırıwǵa baylanıslı jańa baslamalar dawam ettiriledi.