Prezidenttiń shiǵıp sóylewinen ilhamlanıp: Jaslar ushın jańa imkaniyatlarǵa qaray jol
Jaslar ushın jańa shekler: Prezident baslamaları hám keleshekke qaray isenimli jol
Usı jıldıń 14-fevral kúni Prezidentimizdiń Kóksaray rezidenciyasında jaslar menen ótkergen sóylesiwi biz jaslar ushın úlken bir ilham dáregi boldı. Usı sóylesiwde, men Qaraqalpaqstandaǵı belsendi jaslar menen videokonferenciya baylanısı arqalı qatnasıp, Húrmetli Prezidentimizdiń shıǵıp sóylegen sózlerin úlken tolqınlanıw hám ilham menen tıńlap otırdım. Sóylesiw dawamında Húrmetli Prezidentimizdiń alǵa qoyǵan baslamaları hám jaslar ushın jaratılǵan imkaniyatlar, álbette, hár birimiz ushın úlken motivaciya, jańa imkaniyatlar hám úmitlerdi usındı.
Prezidentimiz sóziniń basında, jaslarımızǵa bolǵan isenimi hám olardıń Watandı rawajlandırıwdaǵı áhmiyetin ayrıqsha atap ótti. "Jaslar - xalqımızdıń, Watanımızdıń altın fondı," - degen sózleri hár bir jastı ózine isengen halda alǵa umtılıwǵa shaqıradı. Men, Beruniy atındaǵı mámleketlik stipendiyanıń iyesi hám belsendi jaslar qatarında búgin hám keleshek ushın jańa imkaniyatlarǵa iye bolıwımızdıń áhmiyetli ekenligin jáne bir márte tereń sezinemen. Prezidentimizdiń bul sózlerinen úlken ilham alǵanımdı aytıwdı qáler edim. Bul gápler biz jaslardı úlken juwapkershilik hám kúsh-ǵayratlı maqsetler menen alǵa qádem taslawǵa iytermeleydi.
Sonday-aq, Prezidentimiz jaslarǵa bolǵan isenimin jáne bir márte bekkemledi. Ol óz sózlerinde: "Men qayta-qayta tákirarlawdan sharshamayman. Álbette, bul iygilikli ideyalardı sizler - búgingi Jańa Ózbekstan jasları ámelge asırasızlar," - dep atap ótti. Bul sózler biz jaslarǵa óz maqsetlerimizge erisiwde isenim, úlken kúsh hám motivaciya beredi.
Prezidentimizdiń alǵa qoyǵan baslamaları biz jaslarǵa jáne de keń imkaniyatlar jaratadı. Máselen, jaslar isbilermenligi ushın ajıratılǵan 100 million dollar qarjı jaslarǵa óz biznesin baslawǵa járdem beredi. Sonday-aq, Prezidentimizdiń jaslar ushın jaratılıp atırǵan jeńilletilgen kreditler, startap joybarlarına kirgizilip atırǵan investiciyalar bizge isenim hám jańa ideyalardı beredi. Bunday iygilikli baslamalar jaslardıń imkaniyatların keńeytiw menen birge, jańa baǵdarlarda ózlerin sınaw hám rawajlanıw ushın zárúr resurslar beredi.
Óz bilimimizdi jaqsılaw hám zamanagóy bilimlerdi úyreniw ushın Prezidentimizdiń jaslar ushın bergen imkaniyatları haqqında da aytıwımız kerek. Prezidentimiz búgingi kúnde joqarı oqıw orınlarında bilim alıp atırǵan jaslardıń sanı artqanın hám olardıń dúnyadaǵı eń jaqsı bilimlendiriw mákemelerinde oqıw imkaniyatın tapqanın málim etti. Bul, óz gezeginde, jaslarǵa óz bilimlerin jetilistiriw hám global kólemde bilim alıw ushın úlken imkaniyatlar jaratadı. Bul sóylesiw tek ǵana biz, jaslar ushın jańa perspektivalardı ashıwǵa emes, al hár birimizdi óz maqsetlerimizge erisiwde qollap-quwatlawǵa qaratılǵan áhmiyetli baslamalardı óz ishine aldı. Ásirese, Prezidentimizdiń kámbaǵallıqtı qısqartıw hám bilimlendiriwdi rawajlandırıwǵa baǵıshlanǵan sózleri bizdi jáne de ilhamlandırdı.
Sóylesiwde bilimlendiriwdiń kámbaǵallıqtı qısqartıwdaǵı ornı ayrıqsha atap ótildi. Ózbekstanda hár bir jas ushın bilim alıw imkaniyatların keńeytiw, bárinen burın, kem támiyinlengen shańaraqlarda oqıw imkaniyatların jaratıw ushın kóplegen jańa baslamalar járiyalandı. Solardan biri - kámbaǵal shańaraqta keminde bir perzent joqarı maǵlıwmatlı bolıwı ushın zárúr sharayatlar jaratıw boyınsha qádemler qoyılıwı. Bul, álbette, biz jaslardıń keleshegi ushın úlken imkaniyatlar jaratadı. Sonday-aq, kámbaǵal shańaraqtıń perzentlerine payızsız tálim krediti beriliwi, qosımsha grant ajıratılıwı, kontrakt tóleminiń bir bólegi qaplap beriliwi bizdi jáne de quwandıradı.Biraq eń áhmiyetlisi, men ushın "Jarqın talant" joybarı boldı. Prezidentimiz tárepinen usınıs etilgen bul jańa sistema kem támiyinlengen shańaraqlarda jasaytuǵın qábiletli, bilimge qushtar, biraq finanslıq qıyınshılıqlar sebepli oqıwǵa imkaniyatı bolmaǵan jaslardı sırt elde oqıtıw imkaniyatın jaratadı. Hár bir máhálleden sociallıq qorǵawǵa mútáj hám bilim alıwdı qálegen jaslar tańlap alınıp, olar ushın sırt el joqarı oqıw orınları tańlanadı hám tayarlaw kurslarında oqıtıladı. Bul, menińshe, hár bir jasqa óz potencialın kórsetiw hám dúnya kóleminde bilim alıw imkaniyatın beredi. Meniń, Beruniy atındaǵı mámleketlik stipendiya iyesi sıpatında, bul baslamalar tek ǵana ózimniń ilimiy maqsetlerime erisiwde emes, al elimizdiń keleshegi ushın úlken úles qosıwda hám bar potencialımdı júzege shıǵarıwda járdem beredi. Sonday-aq, Prezidentimizdiń 35 jasqa shekem sırt mámleketlerdiń "top" joqarı oqıw orınlarında PhD ilimiy dárejesine iye bolǵan jaslar ushın turaq jay hám úlken muǵdardaǵı qarjı beriledi degen sózi men ushın oǵada úlken ilham dáregi boldı. Bul, álbette, biz jaslardıń oqıw hám bilim alıwdaǵı imkaniyatların jáne de keńeytedi.
Men, bul gáplerden hám "Jarqın talant" joybarınan júdá tásirlendim hám keleshekte belsendi bolıwǵa, óz bilimimdi rawajlandırıwǵa hám dúnya kóleminde tabıslarǵa erisiwge bekkem qarar ettim. Prezidentimizdiń bul baslamaları biz jaslar ushın jańa sheklerdi ashpaqta hám bizlerdi óz maqsetlerimizge jáne de jetekleydi. Prezidentimizdiń sózlerindegi eń áhmiyetli hám eń ilhamlandırıwshı pikirlerden biri bılay boldı: "Men bir turmıslıq pikirdi tákirarlawdan sharshamayman: bir qızdı oqıtsaq, pútkil shańaraqtı oqıtqan bolamız." Bul sózler meniń pikirimdi óz-ara jaslar ushın úlken juwapkershilik hám úlken imkaniyatlardı seziwge iytermeleydi.
Sebebi bilimli hám aǵartıwshı shańaraq bul - bilimli hám aǵartıwshı jámiyettiń tiykarı.Men Prezidentimizge biz jaslarǵa bolǵan joqarı isenimi hám qollap-quwatlaǵanı ushın ózimniń, qalaberdi, pútkil qaraqalpaqstanlı jaslardıń atınan tereń minnetdarshılıq bildirmekshimen. Onıń jaslarǵa bolǵan isenimi hám olardıń keleshegi ushın kerekli sharayatlardı jaratıw boyınsha alǵa qoyıp atırǵan iygilikli baslamaları biz jaslar ushın álbette úlken ilham hám motivaciya bolıp, hár birimizge jańa jollar, imkaniyatlar hám tabıslarǵa erisiw ushın kúsh beredi.
Keleshekte men hám mendey jaslar jańa maqsetlerge erisiw ushın jáne de belsendi bolıwǵa, Prezidentimizdiń alǵa qoyǵan baslamalarınan paydalanıp, hár bir imkaniyattı joqarı dárejede qádirlewge umtılamız. Biz óz aldımızǵa úlken maqsetler qoyıp, Jańa Ózbekstandı qurıwda belsene qatnasıwımız kerek!
Raya Eliwbaeva SamVMShBU Nókis filialı 4-kurs studenti,
Beruniy atındaǵı mámleketlik stipendiya iyesi
скачать dle 12.1
Telefon
E-mail
