SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Juwmaqlawshı qadaǵalaw hápteligine start berildi

Házirgi kúnde barlıq joqarı oqıw orınlarında juwmaqlawshı qadaǵalawlar hápteligi baslandı hám bul processler tolıq ashıqlıq hám ádalat tiykarında alıp barılmaqta. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı da óz studentleriniń bilimlerin sınaqtan ótkeriw processin joqarı talaplar tiykarında alıp barıwǵa umtılmaqta. Studentler imtixanlardı jazba, awızsha hám test formasında tapsırıp, óz bilimlerin sınaqtan ótkizbekte.
13-yanvar sánesinen start alǵan imtixanlardıń ashıq-aydın ótiwin támiyinlew maqsetinde, filial direktorı A.Esimbetov imtixanlar ótkerilip atırǵan auditoriyalarda bolıp, processti dıqqat penen baqlap bardı. Imtixanlardıń ashıq ótkeriliwine juwapkerler, atap aytqanda, sapa boyınsha komissiya aǵzaları menen sáwbet alıp barıp, olarǵa processlerdi qatań qadaǵalaw astına alıw, hár qanday ádalatsızlıq yamasa qáte-kemshiliklerge jol qoymaw boyınsha qatań tapsırmalar berdi. A.Esimbetov studentler menen sáwbetlesip, imtihan processin tek óz bilimleri hám ilimiy tájiriybelerin sınap kóriw múmkinshiligi retinde qabıllawdı, hár qanday nadurıs yamasa aldawshılıq jollardan jıraq turıwdı, barlıq jumıslardı hadal hám tuwrı jol menen orınlawdı atap ótti.

— Áziz studentler imtihan processlerine sizge óz bilimlerińizdi sınap kóriw ushın usınılıp atırǵan bir múmkinshilik dep qarańlar, hár qanday dámegóylik, qıysıq jollardan jıraq bolıńlar, tek ǵana hám tek ǵana óz zeyinińiz hám bilimińizge súyeniń. Hár qanday aldawshılıqtan hám ádalatsızlıqtan jıraq turıń. Jalǵan jollar tek ǵana ózińizdi aldawǵa alıp keledi" -deydi A.Esimbetov.
Bul sıyaqlı juwmaqlawshı qadaǵalawlar, studentlerge tek bilimlerin sınap kóriw múmkinshiligin berip ǵana qalmay, bálkim, olardı hadallıq hám miynetsúygishlik sıyaqlı zárúrli pazıyletler menen de tanıstıradı.