SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

“English club” dógeregi búgingi kúnde óz iskerligin nátiyjeli tárizde alıp barmaqta

«Ekonomika hám gumanitar pánler» kafedrasında shólkemlestirilgen “English club” dógeregi búgingi kúnde óz iskerligin nátiyjeli tárizde alıp barmaqta. Student-jaslardı ingliz tilin úyreniwge keń túrde tartıw hám olardıń ámeliy bilimlerin bekkemlep barıw maqsetinde hápteniń piyshembi kúni ótkerip barılatuǵın dógerek dawamında studentlerdiń kónlikpeleri qáliplesip barmaqta. Kafedranıń ingliz tili oqıtıwshısı D.Matkarimova basshılıǵındaǵı dógerektiń náwbettegi oqıw shınıǵıwları jáne de qızıqlı tárizde alıp barıldı. Studentler arasında salamat básekini qáliplestiriw maqsetinde dógerek aǵzaları arasında túrli temalarda bellesiw ótkerildi. Atap aytqanda, “Technology in Education” temasında shıǵarmalar tańlawı, videorolikler tańlawı hám komandalar arasında bellesiwler ótkerildi. Bellesiwde student-jaslardan 1-orındı 1-kurs 112-topar “Balance masters” komandası qolǵa kirgizgen bolsa, 2-orın 1-kurs 113-topar “Leaders” komandasına, 3-orın bolsa 1-kurs 110 -topar studentleriniń “First stage” komandalarına nesip etti.

Jeńimpazlar diplom menen sıylıqlandı. Dógereklerde ótkerilgen bul ilájlar studentlerdiń jeke hám kásiplik rawajlanıwda zárúrli áhmiyetke iye boldı. Ingliz tilin úyreniwge bolǵan qızıǵıwshılıqtı jáne de arttırıw hám jaslardıń kommunikativ kónlikpelerin bekkemlewde “English club” óziniń iskerligin nátiyjeli dawam etip atır. Studentler arasında salamat báseki ortalıǵın jaratıw, olardıń dóretiwshilik potencialın júzege shıǵarıw hám toparlıq islew kónlikpelerin asırıwǵa xızmet etiwshi bunday ilájlar keleshekte de óziniń unamlı nátiyjelerin beredi. "English club" dógereginiń xızmetleri studentlerge óz bilim hám kónlikpelerin jáne de arrtırıwǵa hám keleshekte jańa tabıslarǵa erisiwge múmkinshilik jaratadı.