Belgili shayıra student-jaslar menen ushırastı: Sizler bir terek bolıń, jaqınlarıńız sayańızda qáterjam bolıp, dem alsın

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında “Máripat taratıp ” joybarı sheńberinde ádebiyat hám mádeniyattı úgit-násiyatlawǵa qaratılǵan náwbettegi ájayıp iláj ótkerildi. Filialǵa belgili shayıra, Ózbekstan Jazıwshılar awqamı aǵzası, Ózbekstanda xızmet kórsetken mádeniyat xızmekteri hám “El-yurt hurmati”  ordeni iyesi Gáwhar Inoyatovna Ibodullayeva keldi.
Ilájda shayıra student-jaslar menen dóretiwshilik ushırasıw ótkerip, óziniń bay dóretiwshilik hám turmıslıq tájiriybeleri menen bólisti. Filialdıń májilisler zalında ótkerilgen ushırasıwda, Gáwhar Inoyatovna óziniń dóretiwshilik iskerligin, jazıwshılıq jolında dus kelgen qıyınshılıqlar hám jetiskenliklerin studentlerge aytıp berdi. Ilájdı oqıw isleri boyınsha direktor orınbasarı Q. Atnazarov ashıp berdi. Ol jaslardı mádeniyat hám ádebiyatqa bolǵan qızıǵıwshılıqların rawajlandırıw, ilim hám kórkem ónerdi birlestiriw zárúr ekenligin aytıp ótti. Usınıń menen birge, Qaraqalpaqstan xalıq jazıwshısı, filologiya ilimleri kandidati A.Abdiyev da sózge shıǵıp, jaslardı ilim hám ádebiyat salasında jańalıqlardı izlewge, óz dóretiwshiligin rawajlandırıwǵa shaqırdı.. Sáwbetlesiw dawamında shayıra jaslardı ádebiyatqa, kórkem ónerge hám ilimge bolǵan mehir-muhabbatların jáne de kúsheytiwge shaqırdı. Qaharmanımız student-jaslarǵa dóretiwshilik jolına qanday kirip kelgenligi hám dus kelgen qıyınshılıqları haqqında turmıslıq waqıyalardı aytıp berdi. Óz balası Sárdarbekke arnap jazılǵan «Wazıypa» qosıǵın oqıp bergeni bolsa, student-jaslarda ayrıqsha unamlı tásirlerdi qaldırdı. — Sizler bir terek bolıń, jaqınlarıńız sayańızda qáterjam bolıp, dem alsın, obrozlıq mániste terek bolıń, tamır jazıń, kewilińizge jaqın insanlarǵa súyenish bolatuǵın kishi bolsada bir terek bolıwǵa háreket etiń  — deydi shayıra.
Ilájdıń ayrıqsha táreplerinen biri, shayıranıń jaslar menen tek ádebiyat haqqında emes, bálkim jámiyet hám tábiyaattı saqlap -álpeshlew, olardıń keleshegi ushın paydalı islerdi ámelge asırıw haqqındaǵı pikirlerin bóliskenliginde edi.Ushırasıwdan keyin, shayıra Gáwhar Ibodullayeva studentler menen birgelikte filial aymaǵında terek nállerin otırǵızıw ilájı ótkerildi. Bul aksiyanıń maqseti jaslardı ekologiyalıq juwapkershilikke, tábiyattı asırap-álpeshlewge shaqırıw hám de olar ushın jaqsılıq hám iygilikli niyetler menen jańa turmıs baslawǵa túrtki beriw bolıp tabıladı.
Filialdaǵı jaslardıń intellektuallıq qábiletlerin rawajlandırıwǵa qaratılǵan taǵı bir iláj «Zakovat» intellektuallıq oyını boldı. Bul oyında studentler toparlar formasında qatnasıp, shayıra G.Inoyatovna hám basqa ádebiyatshı qánigelerdiń dóretiwshilik iskerligi, sonıń menen birge, ádebiyat salasındaǵı áhmiyetli waqıyalar haqqında qızıqlı sorawlarǵa juwap berdi. Oyın dawamında studentler óz bilimlerin sınaqtan ótkerip, operativ pikirlew hám toparlıq islew kónlikpelerin rawajlandırdı. Jeńimpaz bolǵan komandalar bolsa diplom menen sıylıqlandı.
Bul ilájlar dawamında studentler tek ǵana ádebiyat hám kórkem ónerge bolǵan qızıǵıwshılıqların arttırıp qoymay, bálkim shayıranıń turmısı hám dóretiwshiligimenen jaqınnan tanısıp, olardan motivaciya aldı. «Máripat taratıp» joybarı, filial studentleriniń mádeniy, ruwxıy hám ilimiy potencialın arrtırıwda zárúrli áhmiyetke iye boldı. Shayıra Gáwhar Inoyatovna Ibodullayeva menen ótkerilgen ushırasıw, jaslardı tek dóretiwshilik tarawlarÍNda emes, bálkim turmısta óz jolların tabıw, máselelerge dóretiwshilik jantasıw, insanıy pazıyletlerdi qádirlewge shaqırıp qaldı.
Juwmaqlapa aytqanda, «Máripat taratıp» joybarı sheńberinde ótkerilgen ilájlar tek ádebiyatqa háwesker jaslardı ǵana jámlestirip qoymay, bálkim olardı ilim, mádeniyattı rawajlandırıw sıyaqlı áhmiyetli máseleler júzesinen birlestirdi. Bul sıyaqlı ilájlar jaslardı jáne de jetik, ruwxıy bay hám ilimiy rawajlanıwǵa umtılıwǵa ilhamlandıradı. Málimleme xızmeti