SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filialda Qaraqalpaq tiline mámleketlik til biyligi berilgeniniń 35 jıllıǵı belgilendi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında Qaraqalpaq tiline Mámleketlik til biyligi berilgeniniń 35 jıllıǵına baǵıshlanǵan “Mártebeń bálent bolsın, Ana tilim” súreni astında bayram ilájı ótkerildi. Ilájda Qaraqalpaqstan xalıq jazıwshısı, filologiya ilimleri kandidati A.Abdiyev, Qaraqalpaqstan Respublikasına miyneti sińgen mádeniyat xızmetkeri, belgili shayır A.Ótepbergenov, filial professor-oqıtıwshıları hám student-jasları qatnastı. Oqıw isleri boyınsha direktor orınbasarı Q.Atanazarov ilájdı kiris sózi menen ashıp berip, Qaraqalpaq tiline mámleketlik til biyligi berilgenine 35 jıl tolıwı múnásibeti menen jıynalǵanlardı shın júrekten qutlıqlap ótti.

Ol óz sózinde qaraqalpaq tiliniń mámleketlik til sıpatındaǵı statusınıń tariyxıy áhmiyetine ayrıqsha dıqqat awdarıp, bul waqıya xalqımızdıń ózligin ańlap jetiwi, milliy qádiriyatlarımız hám miyraslarımızdı asıraw, onı keleshek áwladlarǵa jetkiziw jolındaǵı áhmiyetli qádem bolǵanlıǵı haqqında sóz etti.

Iláj dawamında sózge shıqqanlar, Qaraqalpaq tiliniń mámleketlik til sıpatındaǵı statusın tán alıw, onıń milletimiz ushın úlken áhmiyetke iye ekenligin atap ótti. Sonıń menen birge, olar tildiń ózligi, onıń jaslar hám ulıwma jámiyet turmısındaǵı rolin jáne de kúsheytiw, tildi qorǵaw jáne onıń rawajlanıwın támiyinlewdiń áhmiyeti haqqında toqtalıp ótti.

— Qaraqalpaq tili – tek ótmishtiń ǵana emes, bálkim keleshektiń de tili. Bul til arqalı xalqımızdıń ruwxıy hám mádeniy miyrasları saqlap qalınadı —deydi Qaraqalpaqstan xalıq jazıwshısı, filologiya ilimleri kandidati A.Abdiyev. Student-jaslarǵa Ana tilimiz xalqımızdıń ótken ásirler dawamındaǵı ideyaları, qádiriyatları hám mádeniy miyrasların óz ishine alıp, olardı keleshek áwladlarǵa jetkiziw ushın áhmiyetli qural bolıp xizmet etiwi, tilimiz xalqımızdıń joqarı ruwxıy qádiriyatları hám mádeniy baylıǵın saqlaw menen birge, onıń keleshektegi rawajlanıwı ushın bekkem tiykar jaratıwı haqqında túsinikler berip ótildi.

Sonıń menen birge, iláj qatnasıwshılarına Qaraqalpaq tili tariyxı haqqında qızıqlı faktler aytıp berildi. Student-jaslar menen birgelikte Qaraqalpaq tiliniń áhmiyeti, onıń zamanagóy dáwirdegi rawajlanıw baǵdarları hám perspektivaları haqqında qızǵın pikirler bildirildi. Ilájdıń ádebiy bóliminde studentler tárepinen koncert baǵdarlaması qoyıp berildi. Qábiletli jaslar ullı shayır hám jazıwshılarımızdıń Ana tilimizge baǵıshlap dóretken shıǵarmalarınan úzindiler keltirdi hám qosıqlardı atqardı.