SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial jámááti oqıw dárgayınıń 6 jıllıǵın belgiledi

Búgin, 13 –noyabr Samarqand veterinariya medicinası instituti Nókis filialı (házirgi kúnde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı )shólkemlestirilgen kún. Usı sáne múnásibeti menen filialda oqıw dárgayınıń 6 jıllıǵı belgilendi. Iláj basında filial direktorı, professor A.Esimbetov sózge shıǵıp, filial tariyxı, shólkemlestirilgeninen baslap búgingi kúnge shekem erisken hám qolǵa kirgizip kiyatırǵan tabısları, mashaqat hám qısqa dáwirde islengen miynetler haqqında toqtaldı. Jıynalǵanlardı filial shólkemlestirilgenligine 6 jıl tolıwı múnásibeti menen shın kewilden qutlıqladı.

Bunnan soń Ózbekstan Respublikası Veterinariya hám sharwashılıqtı rawajlanıdırıw komiteti Ilim hám bilimlendiriw tarawın rawajlandırıw basqarması baslıǵınıń orınbasarı, veterinariya ilimleri doktorı, professor S.Mavlonov, Qaraqalpaqstan Respublikası Veterinariya hám sharwashılıqtı rawajlanıdırıw komitetiniń Nókis qalası bólimi baslıǵı Q.Pirnazarov, direktor orınbasarları sózge shıǵıp, usı sáne menen hámmeni shın kewilden qutlıqlap, ózleriniń iygilikli tileklerin bildirdi. Búgingi kúnde mámleketimiz tárepinen veterinariya hám sharwashılıq tarawına qaratılıp atırǵan ayrıqsha itibar hám ámelge asırılıp atırǵan iri joybarlar ayrıqsha atap ótildi. Iláj dawamında filial shólkemlestirilgen dáwirlerden baslap jemisli miynet etip kiyatırǵan hámde filialdıń rawajlanıwı ushın úles qosıp kiyatırǵan bir topar xızmetkerler minnetdarshılıq ham estelik sawǵaları menen sıylıqlandı.

—Dáslepki jılları sanawlı xızmetkerler menen jumıs baslaǵanbız, kóp qıyınshılıq hám sınaqlardı birge jeńip, awızbirshilik penen filialdıń búgingi imidjin jarata aldıq—deydi filial direktorı A.Esimbetov —álbette, bunıń artında qansha mashaqatlı miynet jatırǵanı tek ǵana ózimizge málim. Usı qısqa jıllar ishinde kóp ǵana jetiskenliklerdi qolǵa kirgizdik. Qaraqalpaqstandaǵı joqarı oqıw orınları ishinde óz ornımızǵa iye boldıq.
Qutlıqlaw sózleri ham sıylıqlaw máresiminen keyin filialdıń qábiletli student-jasları tárepinen bayram koncert baǵdarlaması qoyıp berildi. Iláj juwmaǵında filialdıń búgingi kúnge shekem iskerligi haqqında videorolik qoyıp berildi.

Maǵlıwmat ornında, Ózbekstan Respublikası Prezidentiniń 2018-jıl 15-16-noyabr kúnleri Qaraqalpaqstan Respublikasına saparında Qaraqalpaqstanda sharwashılıq, balıqshılıq, qusshılıq hám veterinariya tarawı xızmetlerin rawajlandırıw hám usı qániliklerge joqarı maǵlıwmatlı jetik, básekeles kadrlardı tayarlawǵa úlken itibar qaratılıwın atap ótken edi. Usı tiykarda Ózbekstan Respublikası Ministrler Kabinetiniń 2018-jıl 13-noyabrdegi №926-sanlı qararı menen Samarqand veterinariya meditsinasi institutı Nókis filialı dúzildi. Ózbekstan Respublikası Prezidentiniń 2022-jıl 31-marttaǵı «Veterinariya hám sharwashılıq tarawında kadrlar tayarlaw sistemasın túpten jetilistiriw haqqında»ǵı qararı tiykarında Samarqand veterinariya medicinası institutı Samarqand mámleketlik veterinariya medicinası, sharwashılıq hám biotexnologiyalar universiteti sıpatında shólkemlestirildi hám instituttıń Tashkent hám Nókis filialları tiyisli tártipte Universitettiń Tashkent hám Nókis filialları bolıp qaytadan ataldı. Házirgi kúnde filialda 1000 nan aslam student-jaslarǵa 80 nen aslam professor-oqıtıwshı zamanagóy bilimlerdi berip kelmekte.