SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial jámááti hám studentleri «Zıyalılar baǵı»n jaratıwda óz úlesin qostı

Búgin, 9-oktyabr kúni Nókis qalasındaǵı “Aq qus” kompleksi aymaǵı átirapında «Jasıl mákan» ulıwma milliy joybarı sheńberinde respublikamızdaǵı barlıq joqarı hám kásiplik bilimlendiriw mákemeleriniń basshılları, professor-oqıtıwshıları hám student-jasları awızbirshilikte «Jasıl keleshek» ulıwma respublikalıq marafonında qatnastı. Ilájdıń ashılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám Joqarı bilimlendiriw, ilim hám innovaciyalar ministri Qońıratbay Sharipov sózge shıǵıp iygilikli baslama tiykarında shólkemlestirilip atırǵan marafonǵa start berdi.

Usı jer maydanında «Zıyalılar baǵı»n jaratıw sıyaqlı iygilikli maqset gózlengen iláj dawamında 8 gektar jer maydanına terek nálleri otırǵızıldı. Ilájda 200 ge jaqın joqarı oqıw orınlarınıń basshılları, 1500 ge jaqın kewilli studentler qatnastı. Solar qatarında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı basshılları, professor-oqıtıwshıları hámde student-jasları «Jasıl keleshek» ulıwma respublikalıq marafonında belsene qatnasıp, «Zıyalılar baǵı»n jaratılıwında ózleriniń úlesin qostı.

— Húrmetli Prezidentimizdiń iygilikli baslaması menen ilgeri súrilgen «Jasıl mákan» ulıwma milliy joybarı sheńberinde ámelge asırılıp atırǵan jumıslardan ilhamlanıp ótkerilip atırǵan usı marafon bárshemiz, ásirese student-jaslar ushın úlken motivaciya boladı dep oylayman— deydi filial direktorı Adilbay Esimbetov — 1500 ge jaqın jaslardı bir jerge jámlegen ilájda filial jámááti hám studentleri menen awızbirshilikte belsene qatnasıwǵa háreket qıldıq. Iygilikli niyetler menen terek nállerin otırǵızdıq. Búgin shın mánisinde zıyalılar bir jerge toplanıp, baǵ jarattı hám mine usınday iygilikli iske úles qosqanımızdan júdá quwanıshlımız. Iláj júdá kóterińki keypiyatta bolıp ótti. Student-jaslar iláj dawamında jańlaǵan shoq qosıqlarǵa oyınǵa túsip, haqıyqıy atmosferanı sezindi. Búgin jaqsı niyetler menen egilgen hár bir terek nálleri keleshekte jasıl baǵ bolıp, tábiyatımızdıń shırayına-shıray, kórkine-kórik qosıp bizge zawıq baǵıshlaydı