SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Jas veterinarlar» dógeregi tiykarında studentlerge bilim hám kónlikpeler berildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı "Veterinariya medicinası hám farmakologiyası" kafedrasında shólkemlestirilgen «Jas veterinarlar» dógeregi tiykarında búgin filialdıń

3-kurs student-jasları hám texnikum oqıwshılarına «Gelmintlerde koprologikalıq tekseriw usılları» temasında ámeliy sabaq shınıǵıwları alıp barıldı.

Filialdıń oqıw laboratoriyasında ótkerilgen sabaq dawamında kafedranıń assistent-oqıtıwshısı U.Shakilov tárepinen studentlerge keń túsinikler berip ótildi. Studentlerde anıq túsiniklerdi qáliplestiriw maqsetinde hayўan tezegin mikroskop arqalı tekseriwdiń eki túrli usılı kórsetip berildi. Yaǵnıy birinshi usılı izbe-iz juwıw usılı, ekinshisi bolsa fyulleborn usılı. Hár eki usılda tekserip kóriwde áyne nelerge itibar qaratıw kerek ekenligi atap ótildi.

Dógerek aǵzaları tema boyınsha teoriyalıq hám ámeliy bilimlerge iye boldı. Student-jaslarǵa qosımsha maǵlıwmatlar berip ótildi. Sabaq dawamında studentler tekserip kóriw processlerinde ózler qatnasıp, oqıtıwshınıń kórsetpesi tiykarında eki usıldı ámelge asırıp kórdi. Oqıw laboratoriyasında alıp barılatuǵın hár qanday sabaq shınıǵıwları student-jaslar ushın paydalı esaplanadı. Jas veterinarlardıń qánigelik pánlerden bilim hám kónlikpeleri dógerek sheńberinde jáne de bekkemlenip baradı dep oylaymız. Óytkeni, hár bir kafedrada shólkemlestirilgen dógereklerdiń maqseti de áyne sonnan ibarat.