SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Jasıl mákan» ulıwma milliy joybarı sheńberinde filial aymaǵı jáne de abadan bolmaqta

Húrmetli Prezidentimizdiń iygilikli baslaması menen baslanǵan «Jasıl mákan» ulıwma milliy háreketine usı jılı 3 jıl boldı. Usı dáwir ishinde elimizdegi bos maydanlar, jasıl baǵ, máhálle hám kósheler boylap gúl hámde hár túrli terek nálleri egilip, kórkem jasıl maydan jaratıldı. Ózimiz jasap atırǵan máhálle, miynet etip atırǵan hám bilim alıp atırǵan dárgaylarımız abadan hám kórkem bolsa, kewilimiz qáterjam, keypiyatımız bolsa kóterińki boladı.

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında Jasıl mákan» ulıwma milliy joybarı sheńberinde nállerdi egiw akciyaları shólkemlestirilip, oqıw binası aymaǵı jasıl qaplamalı maydanǵa aylandırılmaqta. Atap aytqanda, qaraǵash, yapon saforası, katalpa, tut, jiyde, virgin shırshası sıyaqlı náller, miyweli hám dekorativ terek nálleri egilip kelinbekte. Búgin de «Jasıl mákan» ulıwma milliy joybarı sheńberinde shembilik ótkerilip, barlıq kewilli student-jaslar tárepinen awızbirshilik penen 200 túpke jaqın miyweli hám dekorativ terek nálleri otırǵızıldı. Sonıń menen birge xoshkeypiyat penen salma hám jollar shıǵındılardan tazalandı, student qızlar átiraptı sıpırıp, jollardı tógilgen japıraqlardan tazaladı, nállerdi suw menen suwǵardı.

Usı tárizde jaslar belsendilik kórsetip, filial aymaǵında jasıl maydan jaratılıwında ózleriniń salmaqlı úlesin qostı. Usı kúnge shekem filial jámááti hám student-jaslar baslanǵan «Jasıl mákan» ulıwma milliy háreketi sheńberinde ámelge asırılıp atırǵan akciyalarda belsene qatnasıp kelmekte. Atap aytqanda, usı jılı báhár máwsiminde filial hám oǵan biriktirilgen aymaqlarda 8 mıń túpke jaqın miyўeli hám dekorativ terek nállerin otırǵızıp kelmekte. Álbette, usınday iygilikli jumıslar dawam ettiriledi. Maǵlıwmat ornında, usı jıldıń gúz máwsiminde jámi 7 mıń túp terek hám puta nálleri egiliwi rejelestirilgen.