SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qosıqları qálbimizge mórlengen shayır tuwılǵanlıǵınıń 200 jıllıǵı belgilendi

Bárshemizge belgili, usı jıldıń 16-iyul sánesinde Húrmetli Prezidentimiz “Ataqlı qaraqalpaq shayırı hám oyshılı Ájiniyaz Qosıbay ulı tuwılǵanlıǵınıń 200 jıllıǵın keń nıshanlaw haqqında”ǵı arnawlı qarardı imzalaǵan edi. Áyne kúnlerde elimizdegi joqarı oqıw orınlarında qarardıń orınlanıwın támiyinlew maqsetinde ádebiy keshe hám ilájlar shólkemlestirilmekte. Usı jıldıń 29-oktyabr kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Qosıqları qálbimizge mórlengen shayır» atamasında ádebiy keshe ótkerildi.

Keshede filial basshılları, Qaraqalpaqstan xalıq jazıwshısı, filologiya ilimleri kandidatı A.Abdiyev, Ózbekstan hám Qaraqalpaqstan jazıwshılar awqamı aǵzası, shayır R.Otarbayev, professor-oqıtıwshılar hám student-jaslar qatnastı. Filial direktorı, professor A.Esimbetov ilájdı kiris sózi menen ashıp berip, Ájiniyaz Qosıbay ulı tuwılǵanlıǵınıń 200 jıllıǵı múnásibeti menen jıynalǵanlardı shın kewilden qutlıqladı hámde Mámleketimiz basshısınıń iygilikli baslaması menen qaraqalpaq ádebiyatınıń maqtanıshı bolǵan shayır Ájiniyaz Qosıbay ulı tuwılǵanlıǵınıń 200 jıllıǵı YUNESKO sheńberinde xalıqaralıq kólemde belgilenetuǵın yubileyler dizimine kiritilgenligi hár birimizdiń qálbimizde maqtanısh sezimin oyatıwın ayrıqsha atap ótti.

Keshe dawamında jazıwshı hám shayırlar minberde turıp, xalqımızdıń súyikli shayırınıń ómiri hám dóretiwshiligi haqqında tásirli etip aytıp berdi. Ullı shayırımızdıń bizge miyras bolıp qalǵan shıǵarmaların kóz qarashıǵınday asırap-abaylaw hám keyingi áwladlarǵa tolıq jetkiziw biziń parızımız ekenligi, qaraqalpaq ádebiyatı tariyxında jańa bir bet ashıp, óshpes iz qaldırǵan babamızdıń yadın ulıǵlaw hám 200-jıllıq yubileyi keń belgileniwine úles qosıw ullı baxıt ekenligi túsindirildi. Ájiniyaz Qosıbay ulınıń XIX ásir qaraqalpaq ádebiyatı rawajlanıwına qosqan salmaqlı úlesi, tereń filosofiyalıq mazmunǵa iye qosıqları, alıp barǵan dóretiwshilik iskerligi haqqında student-jaslarǵa tolıq maǵlıwmatlar berildi.

Usınday ádebiy keshelerdi shólkemlestiriw arqalı qaraqalpaq klassikalıq ádebiyatınıń iri tulǵaları bolǵan ullı shayırımızdıń ólmes shıǵarmaları hám bay dóretiwshiligin student-jaslar arasında keń túrde úgit-násiyatlaw imkaniyatı jaratılıwı menen birge olardıń qálbinde qaraqalpaq ádebiyatı hám ullı babalarımızdıń esteligine bolǵan mehir-muhabbattı jáne kúsheytiw, ádebiyatqa bolǵan qızıǵıwshılıǵın arttırıw múmkin boladı.

Ádebiy keshe dawamında qábiletli student-jaslar tárepinen súyikli shayırımızdıń dóretiwshiliginen úzindiler keltirilip, qosıqları aytıldı. Ásirese, xalqımız arasında keń túrde tanılǵan «Bozataw» qosıǵınıń duwtar menen janlı hawazda atqarılıwı jıynalǵanlarǵa xoshkeypiyat baǵıshladı.