SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Gúz-qıs máwsimine tayarlıq processleri boyınsha ata-analar menen ashıq sáwbetlesiw ótkerildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslar hám olardıń ata-anaları qatnasıwında gúz-qıs máwsimine tayarlıq processleri boyınsha ashıq sáwbetlesiw ótkerildi. Filial direktorı A.Esimbetov ilájdı kiris sózi menen ashıp berip, ijarada jasaytuǵın student-jaslardıń jaǵdayınan xabar alıw hám olar jasap atırǵan úylerdegi gúz-qıs máwsimine tayarlıq kóriw processi boyınsha alıp barılıp atırǵan jumıslar haqqında maǵlıwmat berip ótti.

Bunnan soń Nókis qalalıq Ayrıqsha jaǵdaylar bólimi baslıǵı, podpolkovnik J.Djubanıshov hám filial profilaktika inspektorı, kapitan Q.Qayipnazarov sózge shıǵıp, áyne kúnlerde aymaqlarda gúz-qıs máwsimine tayarlıq jumısları ámelge asırılıp atırǵanlıǵı, xalıqtı elektr energiyasi hám ısıtıw sisteması menen úzliksiz támiyinlewde órt qáwipsizligi qaǵıydalarına ámel etiw hám gaz iyisinen záhárleniw jaǵdaylarınıń aldın alıw zárúr ekenligi atap ótildi. Ata-analar hám student-jaslarǵa ashıq sáwbetlesiw dawamında gaz iyisi ne hám onnan qanday jaǵdaylarda záhárleniw júz beriwi, eger usınday kewilsiz jaǵday júz bergende ne islew kerek ekenligi, insan ushın gaz iyisiniń eń kem muǵdarı da qáwipli bolıp, onıń záhárleniwi ushın jeterli bolıwı boyınsha túsinikler berildi.

Ásirese kóp qabatlı úylerde ijarada jasaytuǵın student-jaslar bul máselege nemquraylıq penen qaramay, itibarlı bolıwı usınıs etip ótildi. Studentlerdiń ata-analarına filial tárepinen shólkemlestirilgen isshi topar aǵzaları menen tıǵız baylanısta bolıwı, ijara úylerdegi jaǵdaydan xabardar bolıp barıwları hám perzentlerin sergek bolıuǵa shaqırıwları másláhát berildi. Sonıń menen birge, áyne kúnlerde tiyisli qánigeler menen birgelikte ijara úylerdegi morılardı tazalaw jumısları alıp barılıp, órt qáwipsizligi hám iyis gazinen záhárleniw jaǵdaylarınıń aldın alıw boyınsha ótkerilip atırǵan úgit-násiyat ilájları ayrıqsha atap ótildi. Ashıq sáwbetlesiw soraw-juwap formasında dawam etip, ata-analar qánigelerge ózlerin qızıqtırǵan sorawlar menen múrájat etip, tolıq juwaplardı aldı.